ORANJESTAD, 18 DI NOVEMBER 2015 – ARUBA: Un poco mas di 20 aña pasa un grupo di visionario a tuma pasonan decisivo pa introduci Aruba na e mercado di Meetings, Incentives, Conferences and Events (MICE). Asina Aruba a cuminsa pone su stempel den e mercado como destinacion cu ta disponibel y capaz pa maneha gruponan chikito y mediano y provee nan cu tur servicio necesario. Algun tempo despues di e introduccion di Aruba den e mercado, a sigui formalisa e intencionnan di Aruba pa cu e segmento lucrativo aki cu establecimento di Aruba Convention Bureau (ACB). ACB a bira e ‘go to’ socio pa cu e segmento MICE y esaki den colaboracion semper estrecho cu socionan den sector priva, manera hotelnan, companianan di transportacion, companianan cu ta specialisa den maneho di destinacion (destination management companies -D.M.C.s-) y companianan cu ta bende productonan di recreo. Pa celebra e exito di Aruba den e segmento MICE y pa celebra e di 20 aniversario di Aruba Convention Bureau, cu ta resorta bao di Aruba Tourism Authority, a invita socionan den e industria pa un celebracion special na Hyatt Regency. Pa e ultimo casi 5 añanan,  Aruba Convention Bureau ta encabesa pa Jerusha Rasmijn. El a expresa cu e di cuater lustro di ACB ta un momento importante pa refleha riba e historia di e mercado aki y, principalmente, ta e momento ideal pa reconoce e personanan cu tabatin e vision pa cuminsa cu un mercado importante asina pa Aruba.

Rasmijn a agrega cu e futuro ta mustra bon pa e segmento aki. Economia di Merca a drecha y tin hopi grupo cu tin ‘booking’ haci pa Aruba. E segmento aki ta significativo pa diferente hotel manera The Ritz-Carlton Aruba. ACB y A.T.A. ta keda inova y ta ‘on top of things’, cu un presencia cu ta resalta na exposicion y bolsanan, pa asina presenta e miho di Aruba y permanece den mente di esunnan cu ta organisa viahenan di grupo y ta buscando e destinacion ideal pa nan clientenan. Sanju Luidens-Daryanani, kende ta e Chief Marketing Officer (CMO) na Aruba Tourism Authority a repasa e historia di ACB. El a expresa cu e celebracion ta un conmemoracion tambe di e vision, perseverancia y trabao duro cu a bin ta haciendo riba tereno di e mercado MICE. El a agrega cu ACB ta gradicido di semper por conta cu cooperacion di sector priva, incluyendo AHATA, e companianan DMC y hoteleronan y tur stakeholder cu ta necesario pa provee e ‘wow-effect’ pa gruponan cu ta bin Aruba. Como orador invita,  ACB a invita Luis Piñeda, kende a presenta e tema ‘The science of happiness and its relationship with tourism’, esta ‘E ciencia di felicidad y su relacion cu turismo’. E ser humano tin e tendencia di pensa cu felicidad ta algo emocional, cu e ta un emocion positivo y temporario y cu e ta depende di factornan externo, Piñeda a comenta. Sinembargo e orador a indica cu felicidad ta mas cu simplemente emocionnan y cu e ser humano su felicidad por directamente afecta su bida professional y personal positivamente.

Como parti di e programa tambe a organisa un panel pa discuti ‘Aruba como un destinacion MICE’, cu expertonan manera Wichita Villacres, Geraldine Coutinho, Lisette Malmberg, Myrna Jansen y Jerusha Rasmijn como parti di e panel. A probecha e celebracion special pa rindi tributo postumo tambe na Simon Oduber Jr., kende a hunga un rol crucial den introduccion di e mercado di incentivo na Aruba. Minister di Turismo, Otmar Oduber, ruman di Simon ‘Rudito’ Oduber conhuntamente cu su tata, a expresa cu e y su famia ta sumamente orguyoso cu e homenahe pa su ruman, kende a traha duro pa e mercado aki y a reconoce e pasion enorme cu e tabatin pa su trabao. El a splica cu su ruman semper tabata y ta un fuente di inspiracion p’e. Tambe a rindi tributo na Myrna Jansen-Feliciano kende a hunga un papel instrumental pa cu desaroyo di MICE y tabata un lider ehemplar pa su equipo na A.T.A. Myrna a wordo homenahea dilanti tur presente y a ricibi un obsekio unico di parti di Minister di Turismo, CEO y CMO di A.T.A. y Jerusha Rasmijn.

CEO di Aruba Tourism Authority, Ronella Tjin Asjoe-Croes a subraya e importancia di e mercado MICE cual awe, na 2015, ta representa rond di 20% di e total di turismo for di Norte America y ta creciendo den representacion pa loke ta e mercado di Latino America, unda por mira mas y mas grupo bou di e capa di MICE ta bishita Aruba. E segmento ta uno importante y lucrativo cu nivelnan di ‘gasto’ halto. Esaki ta beneficia nos socionan, nos turismo y nos economia, segun Tjin Asjoe-Croes. E CEO a gradici tambe tur socio pa e sosten valioso y mas cu claro a gradici Aruba Convention Bureau y su ekipo dinamico cu ta consisti tambe di Darysse Dubero-Croes y cu a conta cu sosten di Darice Solognier te cu recien.