Kòrsou ta logra konkistá 3 lugá riba podio

Siman pasá, a tuma lugá e di tres i último buèlta di  2019 IFCA Dutch Caribbean ABC na Boneiru. E kompetensia di windsurf a tuma lugá bou di ouspisio di International Funboard Class Association (IFCA). “IFCA a keda impreshoná ku talentonan den slalòm riba islanan ABC”, esaki di akuerdo ku  Marius van Noort di Windsurfvereniging Curaçao. “Porloménos 2 talento nobo for di ABC lo por drai den tòp mundial di IFCA, esakinan ta Nathan Westera di Aruba i Terence Clappers di Boneiru.

Miéntras ku dos fin di siman konsekutivo tabata tin bastante bientu na Kòrsou i Aruba, e fin di siman pasá tabata tin konsiderablemente ménos bientu na Boneiru. E kondishon di tempu i sitio durante di e kampionato slalòm den ABC a duna tur partisipante un chèns pa e premionan, i esnan  ku a logra skor bou di tur kondishon, eventualmente lo a resultá ganadó.

Den kategoria maskulino bou di 21 e ‘ganadó overall’ a resultá Nathan Westera di Aruba. Su ruman mayó ya ta aktivo riba nivel mundial i ta mustra ku pronto lo tin 2 ruman for di Aruba den kompetensia mundial slalòm (PWA). Su kompatriota Tom de Vries a resultá na di dos lugá den kategoria U21.  Den kategoria bou di 17 Terence Clappers di Boneiru a resultá e ‘ganadó overall’. Riba tur isla, i bou di tur kondishon di tempu e boneriano tabata mihó den U17. Floris Kaffener di Aruba a resultá, den kategoria maskulino bou di 15 e mihó sùrfista na Sorobon i den kategoria damas, Carmen Geelkens di Aruba. Ku esaki, Carmen ta bira e ‘ganadó overall’ den kategoria  damas di 2019 IFCA Dutch Caribbean ABC.

Partisipantenan di Kòrsou a resultá ménos bon na Boneiru. Ku un di dos lugá den kategoria damas, Zara Rozeboom a resultá e mihó di Kòrsou. Finalmente a logra Boris van Noort (U17) i Arthur van Aalst (for di 21 aña) konkistá un lugá riba podio.

E asosiashonnan di windsurf tantu na Aruba, Boneiru i Kòrsou a konfirmá ku otro aña lo tin un di dos edishon di IFCA Dutch Caribbean Championship. “E hóbennan den windsurf a demostrá di tin nesesidat den un ritmo di kompetensia i pa nabegá den diferente kondishon di tempu”, asina Marius a kontinuá bisando. “Sin eksperensia di kompetensia, lo no logra e windsurfer lokal pa sobresali den kompetensianan den eksterior. E Asosiashon di Windsurf ABC lo hasi tur di su parti pa oumentá e partisipashon di mas hóben.” Pa mas informashon tokante di IFCA Dutch Caribbean Championship por bishitá http://www.ifcaclass.com