Tyron de Freitas, Rocco Flava y Tommy-Lee Halman a haya un miembro nobo den e “frontline” di e banda di momento Buleria. Desde awor Ron Martis tambe a uni su mes na e grupo. Den e siguiente simannan lo sali un tema promocional di dje riba mercado, den un esfuerso pa e banda sigui innova, sigui desaroya y sigui crece! Ron Martis ta naci na Aruba dia 21 december 1981 y semper a stima musica. “Mi ta corda for di chikito ta purba canta mescos cu e artistanan di diferente genero cu mi tabata scucha na radio. Semper focus den mi meta pa bira e miho cantante y musico cu mi por ta y haciendo mi best mi a sa di capta hopi atencion di hopi fanatico den transcurso di añanan na Aruba, Hulanda, Corsou y Boneiro”, asina Ron Martis mes ta conta. Cu cancionnan cu a bira popular manera “How U want it”, “E mucha di mi soño”, “Cos ta hot”, “Bisa Mi Nomber”, “Wak bo no ta laat”, “E Secreto”, “Sex cu mi Ex” y mucho mas, el a sa di crece musicalmente y awor ta cla pa subi scenario grandi y sigui pa e siguiente nivel. Buleria ta masha contento di tin Ron Martis den nan team! Su habilidad como artista sigur ta cuadra perfectamente cu e ideologia di e banda. Pa por cera conoci cu e cantante nobo, Buleria lo presenta diabierna awor den e Happy Hour na pool di La Cabana Resort hunto cu mas banda local. Diasabra Buleria lo toca na Sand Bar unda tambe lo presenta nan cara nobo. Pasco Grandi dia 5 di april proximo, Buleria lo presenta den WTC na Corsou, den un evento yama “Choco Latin edition XXL”, hunto cu ERA Autentico, DJ Chris Strick y DJ Carlito. Eynan e pueblo di Corsou lo por cera conoci cu e Ron Martis di e banda di Aruba cu tambe ta masha popular y gusta na Corsou y Boneiro. A funda e banda musical Buleria dia 5 di juli 2014, mientras cu nan prome presentacion a tuma luga dia 16 di juli 2014. Nan ta traha bou di e compania Elite Empire. E nomber Buleria ta origina for di Jerez, Spaña den siglo 19. E nomber mes ta procedente di Burlar. Tambe por interpret’e, teniendo cuenta cu su origen historico y tradicional, como un explosion di energia, libertad di expresion, talento, spontanidad y ritmonan cu ta inicia for di curason. Na papiamento Buleria kiermen “Alegria”, “Rumba” y “Ambiente”. Den apenas algun luna di existencia, Buleria a pega varios cancion na radio y durante fiestanan bailabel, manera ta nan hitnan “Haci amor bailando”, “Late night kiss” y sin lubida nan hit di momento “Laga nan yama bo cayente”. Buleria a caba di lansa algun dia pasa “Stima bo mes” den cual Rocco Flava ta canta hunto cu Biggy Boy.