ORANJESTAD – Star Promotion Foundation ta orguyoso cu Aruba tin su representante den nomber di Srta. Giorgina Martinus, 2da Finalista di certamen Miss Aruba 2013 na e certamen Reinado Internacional del Cafe 2014 cu ta tumando lugar na Manizales, Colombia. Giorgina a yega diasabra anochi Colombia unda cu ya diadomingo el a pasa den varios actividad. 20 candidata di varios pais ta participando na e certamen cu ta goza di hopi popularidad den America Latina. Den luna di Januari full Colombia ta pendiente di e feria unda cu e certamen ta tuma lugar. Anja pasa Aruba a logra clasifica den e top 5 di e certamen cu participacion di Srta. Larisa Leeuwe cu tabata Miss Aruba 2012. Giorgina a conta nos cu e ta pasando hopi bon na Colombia, e schedule ta hopi ocupa, pero cu nan ta hopi pendiente di Aruba. Tur caminda cu e bai e ta conta cu Aruba ta di fiesta, celebrando Carnaval 60 e anja aki y tambe di Aruba su cultura. Alabes e ta probecha pa invita tur hende pa bishita nos isla pa conose nos hendenan inigualable. Giorgina ta gradici tur esnan cu a yude pa e por a bai competi na e certamen cu lo culmina dia 11 di Januari 2014. Pa sigui tur e pasonan di Giorgina por bishita e facebook page “Miss Aruba Pageant” y tambe “SeNd Productionz”. Mas den siman nos lo sigui trese mas potret y cobertura di Aruba su participacion na Reinado Internacional del Cafe 2014!