Global Business Travel Association Conference 2015

ORANJESTAD –  Recientemente a tuma luga na Buenos Aires, Argentina, e conferencia anual di Global Business Travel Association (GBTA). Eynan a reuni mas di 375 profesional di turismo den e area di Travel Management. Aruba Tourism Authority ta mira un balor añadi pa cu e mercado di Travel Managers y hunto cu Aruba Convention Bureau a introduci nos isla como destinacion pa gruponan di negoshi di niche MICE, esta ’meetings, incentives, conferences and exhibitions’.

Aruba Tourism Authority y Aruba Convention Bureau continuamente ta explora y sondea mas oportunidad y posibilidad pa crea y mantene relacionnan duradero cu contactonan den e niche aki cu ta dunando bon resultadonan pa nos isla. Na 2014, e segmento aki a crece den e cantidad di turistanan stayover pa Aruba. Nos isla ta conoci den e segmento M.I.C.E. como un destinacion versatil y bon alinea cu ta ofrece oportunidadnan excelente pa combina diberticion cu reunionnan y seminarionan. E reunion di GBTA, cu a tuma luga na Buenos Aires Sheraton Hotel & Conference Center a atrae Travel Managers procedente di 11 pais for di Latino America y for di Merca.

E grupo di GBTA Argentina a uni cu representantenan di Mexico, Brazil, Peru, Chile, Colombia, Costa Rica, Uruguay y Merca pa expone e ultimo desaroyonan den e segmento di biahe di negoshi. Tabatin ocho sesion educativo, dos tayer nobo, incluyendo sesionnan pa esunnan cu ta cumpra biahe di negoshi, y cinco sesion general. E delegadonan tambe a probecha di reuni y discuti opcionnan pa biahe di negoshi cu e 20 participantenan na e exhibicion, unda A.T.A. y A.C.B. tabata representa pa A.T.A. Argentina.