Den transcurso di fin di siman pasa a tuma lugar na Kingston Jamaica e competencia di Street Soccer jama ‘Guinness Street Football Challenge’ unda Aruba pa promer biaha a participa.

Team Soccer Giants consistiendo di e miembro nan: Claudeone Cavalcante, Emerson De Sousa Leocadio, Albert Geerman, Valdo Leocadio, Bruno Conceição, Alex Conceição, Felix Jose Martinez y Lindsay Moncherry a duna tremendo presentacion y asina a logra e tercer lugar den e competencia.
E anja aki a marca 5 anja di Guinness Street Footbal Challenge y a conta cu presentacion di Trinidad & Tobago, Guyana, St. Lucia, Barbados, St. Vincent, Jamaica, Haiti y St. Kitts.

E competencia di Guinness Street Football Challenge a hanja hopi atencion di prensa y e weganan a wordo cubri y transmiti door di e canal di television Americano ESPN.

Na nan jegada diaranson anochi na Aeropuerto Internacional Reina Beatrix, un grupo grandi di famia y amigonan a encontra nan unda a duna nan un caluroso bon bini bek cas bon mereci!

Diahuebs durante dia e Team Soccer Giants a wordo cordialmente ricibi pa Minister Alex Schwengle na Bestuurskantoor. Aki nan a combersa tocante e weganan y e experiencia cu e team a adkeri durante e competencia.

Di parti di Romar Trading nos kier extende palabranan di gratitud y hopi pabien na e Team Soccer Giants cu a hasi un tremendo trabou representando Aruba!