ORANJESTAD – Maart, 2017: Diabierna mainta a tuma luga e firmamento di un CAO nobo pa e empleadonan di Aruba Bank cu Federacion di Trahadonan Arubiano (FTA). Negociacionnan pa e contracto colectivo 2017-2019 pa trahadonan a cuminsa den e di tres kwartaal di aña 2016.

E acto di firmamento a tuma luga na Aruba Bank Camacuri, unda a conta cu presencia di esunnan cu a negocia e contracto y representantenan di e trahadonan. Di parti di Aruba Bank, Sharon Fränkel – Managing Director y Barbara Bronswinkel – Regional Human Resources  a firma e contracto cu Hubert Dirksz, presidente di FTA y Tyrone Bremo vice presidente; y di parti di e empleadonan a firma e shop stewardnan Mirla Koolman y Alexander Arends.

Un di e puntonan principal di e CAO nobo ta e acuerdo pa e areglo di “costo di bida” di minimo 1% den añanan cu e economia local experencia un deflacion. Otro puntonan cu a logra ta cu ta hisa e bonus pa e trahado cu ta celebra su aña di servicio y tambe a hisa e dianan di vakantie a base di edad di e trahado. Aruba Bank ta orguyoso di por a yega na un CAO pa tres aña mas, unda cu e empleadonan ta sigura di nan trabao y e garantia di nan beneficionan secundario. Esaki ta sigura un ambiente di trabao cu ta bon y saludabel pa tur e empleadonan.

Tur partido envolvi a gradici e negociadonan di e CAO, esta pa Aruba Bank Barbara Bronswinkel y Manager Recursonan Humano, Suzette Bareño; e shop stewardnan representando empleadonan cu ta miembro di FTA Mirla Koolman y Alexander Arends; y Rudy Geerman, kende a representa FTA.