A percura pa nan uniform

ORANJESTAD, Aruba – 6 di juni 2016: Recientemente a tuma luga entrega di uniformnan pa e dos landadonan cu lo forma parti di e delegacion di Aruba cu lo participa na Weganan Olimpico 2016 na Rio de Janeiro, na Brazil. Aruba Bank ta hopi orguyoso di por brinda apoyo y sosten na e dos atletanan olimpico Allyson Ponson y Mikel Schreuders durante di nan participacion den eventonan di landamento den exterior. E sponsor aki ta wordo realisa en conexion cu e acuerdo entre Aruba Bank y Comite Olimpico Arubano (COA).

Nataly Simmons, Director Ehecutivo di Aruba Bank a haci entrega oficial di e uniformnan cu ta wordo uza tambe durante di nan participacion na eventonan di landamento internacional prome cu nan participacion na Weganan Olimpico.

“Nos ta desea nos streanan olimpico y nan compañeronan tur cos bon durante di e competencianan. E dos hobennan aki ta world-class athletes y nos ta hopi contento di por sostene nan y nan compañeronan cu lo carga e nomber di Aruba den exterior”, asina Simmons a expresa. Aruba Bank ta hopi orguyoso di por contribui na nos atletanan hoben y ta gradici COA pa e oportunidad aki.