Registra y siña con pa bira un “Entrepreneur”

ORANJESTAD, Aruba – 7 di Juni 2018: E aña aki Aruba Bank ta organisa su di 9 proyecto di Good4theNeighborhood (G4N18) y e di 2 edicion di Building Entrepreneurs. Tin cupo pa 50 studiante entre 13 y 17 aña cu ta atende un scol secundario.

E programa lo dura 3 siman y lo cuminsa dialuna dia 9 di Juli. Durante e periodo di e actividad e studiantenan lo ricibi lesnan con pa bira un entrepreneur, y guia pa yuda nan bira doño di nan propio negoshi. E studiantenan lo mester traha den team, nan lo haya lesnan riba diferente topico manera time management, product & service, customer segmentation, marketing, budgeting y hopi mas. E lesnan cu nan lo ricibi lo ta di diferente persona di nos comunidad, kendenan mes ta entrepreneur of specialista den cierto area of cierto topico di e curso durante e simannan.

Nan lo tin e oportunidad di conoce diferente persona y lo ricibi programa semanal, unda e studiantenan lo mester ta presente durante e curso y tayernan.

Cinco (5) miembro di hurado lo duna e participantenan bon conseho pa asina nan por logra realisa nan producto final miho posibel.

E huradonan lo evalua tur trabou pa por eligi ganado di e Good4theNeighborhood 2018. Registracion ta via website di Aruba Bank, y pa mas informacion por sigui Aruba Bank via Facebook y Instagram of por e-mail nos na g4n@arubabank.com.