ORANJESTAD, Aruba – 4 di juli 2016: Diabierna dia 1 y diasabra dia 2 di Juli a tuma luga un radiothon na Palm Beach Plaza na beneficio di Fundacion pa Nos Comunidad. E evento tabata combina cu diferente actividad. Manera semper Aruba Bank, sea e banco cu ta carga nomber di nos pais, a haci un donacion substancial den nomber di tur su miles di clientenan. Di e forma aki Aruba Bank ta reconfirma su compromiso cu comunidad, siendo un bon ciudadano corporativo.

Fundacion pa Nos Comunidad ta trahando duro pa por yega na su propio edificio, pa amplia nan servicionan y yuda esunnan di menos recurso aki na Aruba di un manera miho te hasta na guianan pa por re integra den comunidad como ciudadanonan financieramente stabiel y independiente. A pidi comerciantenan pero tambe tur hende en particular pa join nan durante dos dia pa yega nan meta di AWG.170.000 pa e edificio.

Durante e 2 dianan aki tabatin diferente actividad y musica  cu a trece ambiente na Palm Beach Plaza. Tambe tabatin hopi atraccion pa muchanan. Tabatin diferente boluntarionan rond di Aruba pa yuda colecta. Un total di 8 emisora di radio a traha hunto y asina haci e yamada di FPNC resona riba henter nos isla pa participa y contribui.

Durante e Radiothon aki, Rocila Acosta, miembro di gerencia di Aruba Bank a otorga e fundacion un check na balor di 10 mil florin como sosten pa FPNC logra yega na un edificio nobo den un esfuerso pa expande nan trabao boluntario den yuda e comunidad Arubano, en particular esunnan di menos recurso.

Despues di a conta tur e donacionnan hunto, a cera un suma di Afl. 155.000,= cu ta practicamente locual a spera di colecta durante e evento. Esunnan cu kier yuda ainda por haci un donacion via banco sin ningun problema.