ORANJESTAD, Aruba – 10 di November 2015: Dialuna Aruba Aloe den representacion di Jose van der Linde a duna un bunita presentacion na e alumnonan di 5de y 6 de klas di Scol Basico Washington na Noord. Den un forma masha carismatico el a mustra e alumnonan con pa corta aloe. Esaki ta un di varios eventonan cu e compania a organisa durante aña pa conmemora su 125 aña di existencia.  Durante mas di un siglo, Aruba Aloe a mantene e tradicion di e cultivo di Aruba bibo. Aruba Aloe ta convenci cu tin un manera pa mantene e storia latente y e importancia di cultura di Aruba bibo dor di pasa e conocemento aki pa e hobennan.

Jose van der Linde den su demostracion a bay dor di e proceso dilanti di e hobennan mescos c u nan ta haci a diario pa e turistanan y esunnan interesa di sa mas di e produccion na e fabrica situa na Hato. Tambe el a splica di e cantidad di procesonan cu un mata ta pasa aden y e cambio di color. Tambe el a splica con antes e azeta di color scur tabata wordo exporta como laxante y tabata hunga un papel interesante e importante pa economia di Aruba.

E alumnonan di Scol Basico Washington por a comprende e balor medicinal di e gel di Aloe Vera na momento cu bo tuma esaki internamente y e importancia di e mata pa herida nan ora e ta wordo uza externamente. Aruba, debi na e condicion di su suela, por cultiva e Aloe Vera cu un nivel halto di mineralnan y di vitamina, loke ta haci e Aloe di Aruba esun di mas miho di mundo.

E alumnonan tabata  masha entusiasma y interesa y tabata formula masha hopi pregunta interesante relevante y constructivo. Incluso tabata interesa pa sa  di e procesamento di e gel y e productonan cu ta deriva di esaki. Na final den combersacion cu e alumnonan por a comprende c u nan a haya e informacion interesante y a keda hopi impresiona riba e hecho cu Aruba Aloe ta existi pa asina hopi tempo. E studiantenan a disfruta di e presentacion den e forma dibertido y toch serio y consiso cu Jose van der Linde a hiba nan den e recorido di Aruba su cultura y tradicion. Na dado momento por a presencia e alumnonan encurasha Jose pa come e gel di Aloe cu el a caba di corta. Como regalo di despedida, e alumnonan a ricibi for di Aruba Aloe un lipbalm pa conta solo y un invitacion personal pa e mayornan pa bin bishita e museo y fabrica di Aruba Aloe na Hato. Di  e forma aki tambe Aruba Aloe kier extende e invitacion pa tur mucha y famianan na Aruba pa bishita nos museo y asina biaha den tempo y conoce e rikesa di Aruba su tradicion, di Aruba su Aloe.