ORANJESTAD, Aruba – 25 di October 2015: Cu un setup masha bunita reflehando colornan festivo, a ilumina e bunitesa di e plantacion di Aloe na Hato y di e manera festivo aki a yama bon bini na e invitadonan, fiel empleadonan, esunnan cu a haci e exito grandi di e empresa aki bira realidad cu awe nan ta celebra e di 125 aña di existencia. Un empresa cu ta solicita pa 30 paisnan grandi rond di mundo pa por cumpra e productonan traha aki na Aruba, cu e producto mas bieu riba nos isla cu ta nos Aloe. Director di Aruba Aloe, Louis Posner a dirigi su mes na esunnan presente entre otro Gobernador,  Fredis Refunjol y su señora. Minister Arthur Dowers y su señora y diferente dignatarionan y empresarionan di nos isla. Louis Posner a pusha pa globalisacion di e marca di Aruba Aloe y a construi un fabrica moderno banda di e veldnan original di Aloe na Hato. El a describi e proceso di cambio y innovacion, unda a cultiva e veldnan mas intensivamente y a desaroya mas producto cu un presentacion  completamente nobo y moderno y cu ta keda den e esencia di e producto. A elabora riba tanto cambionan como inversion, awendia ta conta cu 17 tienda na Aruba y un na Amsterdam y principalmente ta enfoca riba benta online cu websitenan tanto na Merca como na Europa cu ta genera benta impresionante. Tambe por a nota presencia di mas di 80 empleado di Aruba cu no por e keda sin demostra nan orguyo e anochi aki.

Loke a capta atencion y hopi admiracion ta e presentacion di Posner riba e producto medicinal, Alhydran, cu ta ser elogia door di e comunidad medico y ta ser bendi den mas di  30 paisnan pa su efectonan curativo riba kemaduranan y herida nan y pa su efecto di reduccion di e cicatriznan. Managing Director, Walter Mosher a duna palabra di elogio na e trahadornan y tambe tur e partners cu a sostene e proyecto y a haci mencion di un  aspecto di importancia na e cambio den produccion a keda efectua na momento cu a tuma  na servicio Profesor H.E. Junginger, Ph.D, un profesor den Tecnologia Farmaceutico y Dr. Koos Veel. Aki a desaroya un linea nobo di productonan, cuminsando cu shampoo y desodorante te cu productonan pa cuido di cuero y pa proteccion solar, aumentando e linea di produccion for di 5 producto pa mas di 100 producto. Productonan di Aruba Aloe Balm ta atrae e atencion di un audiencia internacional.

Entre esunnan presente tambe por a nota Edita Eman cu a keda reconoci pa su aporte grandi na e añanan di exito di Aruba Aloe y a haya un bunita regalo di recuerdo di e compania. Aruba por ta orguyoso di e parti importante di nan cultura y historia. Loke ta refleha den nos escudo y hopi di nos ainda ta uza Aloe como tratamento, pero mas tanto e orguyo sigur ta e 125 añanan di e compania cu a sa di duna Aruba reconocimento internacional y a sa di mantene Aruba como e isla di produccion di Aloe. Pabien Aruba Aloe.