Celebrando expansion di flota y crecemento stabiel

ORANJESTAD, Aruba – 4 di juli 2016: Recientemente Aruba Airlines a celebra e firmamento di contract pa expansion di nan flota cu un Airbus A319 mas, pa ofrece clientenan un cobertura ainda mas grandi di nan rutanan pa Sur America y Norte America. Aruba Airlines ta masha gradici na comunidad di Aruba y tur cliente en general pa e tremendo acogida cu e compania ta ricibi, cual ta haci posibel e introduccion di su di cuater avion cu codigo di vuelo “AG”.

“E incorporacion di e avion aki den nos flota ta demostra e solidez di Aruba Airlines y nos compromiso cu nos clientenan pa brinda alternativanan nobo, mas opcionnan y e ta parti di e planning di nos proceso di crecemento stabiel,” asina Marketing Manager pa Aruba Airlines, Vanessa Camacho a laga sa.

E contract pa e ‘lease’ di e avion a tuma luga na Aruba na oficinanan di Aruba Airlines situa na Cumana riba dia 21 di juni ultimo. Aruba Airlines ta huur e avion di e compania SMBC Aviation Capital Limites pa un periodo di cuater aña.

Aruba Airlines ta funda desde dia 31 di januari 2006 y a realisa su prome vuelo dia 31 di mei 2013. E compania Arubiano tin su oficina principal situa na Cumana 69 aki na Aruba. Aruba Airlines ta bula cu avionnan nobo y moderno, Airbus A 320-200 cu un capacidad di 150 pasahero, parti den 12 pasahero Business Class y 138 den Economy Class. Nan tin un total di 300 empleado staciona na tur nan oficinanan den tur nan mercadonan. Na Aruba so tin 139 empleado den servicio directo.