Emanuel Dilario a gana pasashi pa Corsou. Mayoria pasashi bendi tabata pa Corsou y Santo Domingo
ORANJESTAD, Aruba – November 2015: Sin duda Aruba Airlines ta e aerolinea cu mas a crece den aña 2015, no solamente den rutanan nobo, pero sigur den cantidad di pasahero y tambe cantidad di empleadonan. Como un forma di aprecio y pa yama e pueblo “danki”, a organisa un “Shopping Night” diabierna ultimo cu animacion di gaita El Parandero.
Durante e “Shopping Night” a bende pasashinan pa tur destinacion cu no menos di 15% di descuento, algo cu sigur a cay den masha bon tera pa e dianan nos dilanti y e lunanan halto di biahamento cu lo sigui. Aunke cu kisas hopi lo a pensa cu e destinacion mas popular lo tabata Miami, toch realidad a demostra cu e pasashinan mas “hot” tabata pa nos isla ruman Corsou y pa Santo Domingo. Ambos vuelo lo start dentro di algun siman mas, pues den luna di december proximo, pero di cual tin hopi expectativa!
Na final di e evento, Aruba Airlines a rifa un pasashi entre tur cliente cu a probecha di e shopping night y cu a cumpra nan pasashi. Pa por a gana e persona mester tabata presente na e sitio. E premio a bay pa Emanuel Dilario cu a cumpra un pasashi pa Corsou y awor el a gana un ticket mas pa e mesun destinacion. Emanuel a keda masha contento cu su premio y a yama Aruba Airlines danki y sigur lo haci bon uzo di dje.
Aruba Airlines ta bula cu avionnan nobo y moderno, Airbus A 320-200 cu un capacidad di 150 pasahero, parti den 12 pasahero Business Class y 138 den Economy Class. Aruba Airlines ta bula tur dia pa Miami na Merca, pa Maracaibo y Valencia na Venezuela, sin lubida 4 vuelo pa siman pa Panama. Dentro di poco lo start 3 vuelo pa siman pa Corsou y tres vuelo pa siman pa Santo Domingo.
A funda Aruba Airlines dia 31 di januari 2006 pero a realisa su prome vuelo dia 31 di mei 2013. E compania Arubiano tin su oficina principal situa na Cumana 69 aki na Aruba pero cu oficinanan di representacion na Panama, Miami, Venezuela y awor na Corsou y Santo Domingo tambe. Aruba Airlines tin un total di 300 empleado staciona na tur nan oficinanan den tur nan mercadonan. Na Aruba so tin 139 empleado den servicio directo.