Cu un avion completamente “sold out” Cu e tarifanan mas economico den mercado

ORANJESTAD, Aruba – 16 di december 2015: Cu su avionnan nobo Airbus A-320 cu ta carga 150 pasahero sinta comodo, Aruba Airlines a inaugura su vuelonan pa Corsou y Republica Dominicana. E vuelonan lo ta riba diaranson, diabierna y diasabra. Hunto cu directiva di e compania, a yama e prome pasaheronan bon bini abordo.

Director General di Aruba Airlines, Onno de Swart, tabata masha contento na momento di inaugura e vuelo aki. El a sigura cu for di prome dia di Aruba Airlines tabatin plannan pa bula den region, pero semper a keda pendiente pa forma un “hub” prome pa por hustifica e vuelonan di distancia asina cortico cu avionnan asina grandi. “Pero awor cu nos tin un bon hub na Aruba cu conexion diario pa y for di Venezuela, Panama y Miami, a bira ora pa expande nos halanan tambe pa Corsou y Republica Dominicana”, asina Onno de Swart a duna di conoce.

Presente na e ceremonia inaugural tabata representantenan di Aruba Tourism Authority y Aruba Airport Authority, pa felicita gerencia y empleadonan di Aruba Airlines cu e dos vuelonan aki. E prome vuelo aki tabata “sold out” cu hasta tabatin pasaheronan riba “stand by” mustrando e interes grandi cu tin pa ambos destinacion.

E vuelo AG-501 ta sali 8:15am for di Aruba pa Corsou y ta sigui 9:30am for di Corsou pa Republica Dominicana y sali bek 2:30pm pa Corsoy y 4:15pm ta bula for di Corsou pa Aruba.

“Nos meta ta pa ofrece un vuelo placentero, den avionnan nobo y moderno, cu un servicio personal y sin lubida na un tarifa husto”, segun Onno de Swart. El a bisa di tabata sorprendi di tarifanan prome cu Aruba Airlines a inicia vuelo, den cual pasaheronan tabata paga mas cu 500 florin pa biaha pa Corsou.

Aruba Airlines ta inicia su vuelonan pa Corsou cu un tarifa di introduccion di 288 florin y pa Republica Dominicana pa 488 florin. Ta bon pa subraya cu ambos tarifa ta inclui “airport tax” na ambos destinacion. Tene cuenta cu si suma e impuesto di salida di Aruba y Corsou hunto ta yega casi 100 florin pa pasahero. Na Aruba pasaheronan ultimo tempo tabata paga hasta riba 500 florin pa biaha 15 minuut pa Corsou y riba 1100 pa Republica Dominicana. Por mira cu Aruba Airlines sin duda ta percura pa, via competencia, reduci tarifanan di pasashi na normalidad atrobe!

Pa por cumpra pasashi pa biaha cu Aruba Arilines, por bishita nan oficina di benta situa na Cumana 69, na aeropuerto, via website of via bo agencia di biahe preferi. A funda Aruba Airlines dia 31 di januari 2006 pero a realisa su prome vuelo dia 31 di mei 2013. E compania Arubiano tin su oficina principal situa na Cumana 69 aki na Aruba pero cu oficinanan di representacion na Panama, Miami, Venezuela y awor na Corsou y Santo Domingo tambe. Aruba Airlines tin un total di 300 empleado staciona na tur nan oficinanan den tur nan mercadonan. Na Aruba so tin 139 empleado den servicio directo.

Aruba Airlines ta bula cu avionnan nobo y moderno, Airbus A 320-200 cu un capacidad di 150 pasahero, parti den 12 pasahero Business Class y 138 den Economy Class. Aruba Airlines ta bula tur dia pa Miami na Merca, pa Maracaibo y Valencia na Venezuela, sin lubida 4 vuelo pa siman pa Panama, 3 biaha pa siman pa Corsou y tres biaha pa siman pa Santo Domingo.