Crucero unico cu programanan innovativo y clasico

ORANJESTAD, Aruba – November 2015: E temporada halto di biahe crucero a cuminsa pa Aruba y tur pronostico ta mustra cu Aruba lo crece den cantidad di bishitante den e segmento aki otro aña. Ta mustra, teniendo na cuenta tur e cifranan disponibel y reservacionnan di barconan, cu Aruba lo mira un crecemento alrededor di 9% den cantidad di pasaheronan via crucero otro aña, compara cu e aña aki.

Recientemente a bishita Aruba pa prome biaha Mein Schiff 3, cu ta parti di e famia di TUI Cruises. E capitan di e barco, Ioannis Anastasiou di nacionalidad Griego cu a traha pa 15 aña cu Super Fast Ferries na Europa prome cu el a cuminsa na TUI como capitan, ta splica cu TUI Cruises pa 2019 lo bay tin un flota cu un total di ocho barco, ora cu Mein Schiff 8 cuminsa nabega. Mein Schiff 1 y Mein Schiff 2 lo wordo traspasa pa TUI Thomson di Inglatera ora cu e di ocho barco keda cla.

Mein Schiff 3 ta registra na e isla di Malta, a cuminsa nabega riba 13 di juni 2014 y tin un capacidad di 3753 pasahero y mas cu 1000 tripulante. Riba e barco ta traha y biba personanan di 39 diferente nacionalidad, cu representacion predominante di e nacionalidadnan Filipino, Indones y Aleman. Tur miembro di e tripulacion ta compronde y papia Ingles y esunnan cu no por papia Aleman ta sigui un curso riba e barco riba nan dia liber y ta ricibi un certificado ora nan completa e curso cu exito.

E yegada di Mein Schiff 3 ta marca un expansion di turismo crucero pa nos isla, den e cantidad di turista, pero principalmente den e perfil di e turista. E huesped di TUI Cruises ta procede pa 90% for di Alemania y nan escogencia y gusto den e area di recreacion, esta actividadnan y excursionnan, tambe ta innovativo y unico, compara cu otro bishitantenan crucero.

Pa Aruba Tourism Authority, e yegada di e crucero nobo aki ta un indicacion cu e strategia pa atrae lineanan di crucero Europeo ta dunando su frutonan, cual riba su mes ta contribui na un diversificacion den e mercado aki mes. E barco ta ofreciendo biahenan di 7 y di 14 dia, uzando La Romana y Barbados como e wafnan pa ‘turnaround’.

E bishitante cu ta biaha riba Mein Schiff 3 ta busca experiencianan unico den e mercado grandi aki. Por ehempel, un di e excursionnan mas popular na wafnan cu ta suficiente sigur y apto pa core bicicleta, ta e ‘bike tour’.

Mein Schiff 3 ta resalta tambe pa su programa di musica y museo. E ta e prome barco crucero cu su mesun orkesta filharmonico y actornan cu ta presenta un programa di musica clasico tur dia pa nan huespednan por disfruta y relaha na nan gusto.

E programa educacional, cu ta conta cu colaboracion di e museo maritimo di Hamburg, Alemania, tambe ta algo hopi diferente y innovativo. A bordo di e barco tin un museo, unda cu presentacionnan tocante di lama, bida maritimo y medio ambiente ta wordo presenta. E programa ta bastante extenso y hopi interesante.

Aruba Tourism Authority conhuntamente su socio nan incluyendo mas cu claro Ministerio di Turismo, Aruba Ports Authority y e shipping agent ‘S.E.L. Maduro and Sons, a yama bonbini na TUI Cruises y Mein Schiff 3 y ta hopi orguyoso di por ofrece Aruba como un waf pa nan huespednan, habriendo un segmento nobo y diferente den biahe crucero pa nos isla.