Minister Oduber ta premira un bon aña 2016 pa nos Turismo

Den e prome dos luna y mei di e aña aki, turismo crucero a conoce un aumento impresionante riba caminda pa supera e total premira di e cantidad di turista pa e aña aki. Sin duda ta un satisfaccion grandi pa mira diaranson ultimo, cinco barco crucero den waf di Oranjestad caminda entre 13 pa 15 mil persona a pisa suela di Aruba.

Pa e luna di Februari Aruba a conoce un aumento di 7.2% pa locual ta trata e cantidad di turistanan crucero compara cu e mesun temporada na aña 2015. E aña aki nos a yama bon bini na 81,574 bishitante compara cu 76,067 na 2015.

Desaroyonan positivo cu ta percura pa hopi movecion den centro di ciudad manera diamars ultimo caminda entre 13 mil pa 15 mil persona a bishita nos isla riba un solo dia y a brinda sosten grandi pa centro di nos ciudad, pa tour operators, pa cantidad di otro servicio cu nos hendenan ta brinda na nos bishitantenan inyectando un gran cantidad di placa den nos economia.

Pa locual ta trata e cantidad di turista cu ta hospeda riba nos isla tambe a conoce un crecemento di 4.9% compara cu e mesun temporada na 2015. Aruba a yama bon bini den e luna di Februari un total di 96,185 bishitante cual ta ekivalente na un aumento di 6.9% cu Februari 2015.  Aruba su mercado principal, Mercado Mericano a conoce un aumento di 3.7% cual ta traduci den 1,895 turista mas compara cu Februari aña pasa.

E cifranan ta papia pa nan mes y ya caba ta mustra riba 30 mil turista adicional den apenas dos luna di tempo caminda un biaha mas e mercado Mericano ta sigui su tendencia fuerte como e base mas grandi pa nos turismo. Banda di esaki tin tambe aumento positivo for di e mercado Colombiano y otro mercadonan.

Ta desaroyonan positivo cu ta ser logra dor di dedicacion y seriedad grandi di nos  oficialnan di turismo, hunto cu tur otro trahadonan den e sector aki cu nan servicio optimal y positivo pero lamentablemente un grupo chikito di politiconan di oposicion, simplemente no por biba cu e berdad cu e desaroyo turistico di nos pais, ta conoce un cambio drastico, sumamente positivo y a crea un base solido pa economia di nos pais. Minister Otmar Oduber ta di lamenta cu tin politiconan manera Sr. Dangui Oduber di fraccion di MEP, cu no ta papia nada bon di nos turismo, hincando duda den nos pueblo, insinuando cosnan negativo cu no ta existi, solamente pa sirbi su proposito politico y fracaso di su partido durante ocho aña di gobernacion pa cu nos turismo. “Ora cosnan ta bay bon pa bo pais, ta na su luga pa bo mustra un tiki patriotismo, sikiera un tiki sosten moral pa motiva ainda mas, tur cu ta traha den e sector turistico y tambe na henter pueblo di Aruba” Minister Otmar Oduber ta mustra.