Aruba Tourism Authority a sigui desaroyo di cerca. Varios vuelo a cancela den fin di siman

ORANJESTAD, Aruba – 25 di januari 2016: “Danki Dios tur vuelo a normalisa atrobe y turistanan cu a keda pega ta saliendo y otronan cu no por a biaha awor ta yegando”, asina Ronella Tjin Asjoe-Croes, Chief Executive Officer di Aruba Tourism Authority a duna di conoce. E ta referi na e retonan cu a atende den fin di siman, relaciona cu e “snow storm” cu a afecta varios ciudad di Merca. Hopi aeropuerto a cera, cu consecuencia cu avionnan a keda pega pa algun dia na Aruba, mescos e turistanan. Si mira e imagennan di autonan, avionnan y hasta casnan casi full tapa cu sneeuw, anto ta mas cu logico cu e turistanan cu a keda “pega” na Aruba tabata contento di por a keda dos tres dia mas den e solo cayente akibanda en bes di ta den e friu pisa cu tabatin na Merca.

Hotelnan mes a atende cu e turistanan pega, pues no tabatin ningun caso di emergencia cu a yega na ATA, pa turistanan cu a keda sin alohamento of tipo di problemanan asina. Hecho ta cu hotelnan a experencia huespednan cu no por a regresa nan pais pero di otro banda esunnan cu mester a yega pa ocupa e cambernan ey tampoco por a yega. Pues pa e hotelnan. E situacion tabata manehabel. Desde diabierna 22 di januari caba e cancelacionnan a cuminsa drenta, pa vuelonan di American Airlines, SouthWest y United Airlines. Asina e retonan a bira mas grandi ora cu diasabra e situacion di tempo a empeora cu consecuencia cu na Aeropuerto di Aruba a cancela 10 diferente vuelo for di diferente destinacion den Merca.

Desde diadomingo a cuminsa nota mehoracion y aunke United Airlines a cancela su vuelonan, toch American Airlines a cuminsa hiba pasaheronan Miami y desde eynan mira con ta sigui atende cu nan pa yega nan destinacionnan. Mesun maneho SouthWest Airlines tambe a aplica pa pasaheronan pega na Aruba. Asina mes e cancelacionnan riba diadomingo a inclui vuelonan di SunWing, Jet Blue, United, American Airlines y SouthWest. Esunnan cu a opera normal riba diadomingo ta vuelonan pa Miami, Orlando, Atlanta, Boston, Toronto, Chicago y Charlotte.

Desde dialuna 25 di januari e situacion a normalisa y tur vuelo biniendo pa Aruba y esunnan saliendo for di Aruba a bay normal. E reto ta cu a keda pasaheronan pega riba nos isla pa cual algun aerolinea a evalua pa agrega un vuelo adicional pa por saca mas pasahero posibel pa hiba nan na nan destinacion. Na final no a logra, pero toch e situacion ta manehabel y ta spera cu e situacion di turistanan cu a keda na Aruba pa motibo di mal tempo na Merca, lo ta soluciona na un manera basta lihe.