Ganadonan: Berlinda Engelhardt y Bucuti & Tara Beach Resort

ORANJESTAD, Aruba – Juni 2019: E aña aki Aruba a destaca na e ceremonia anual di Caribbean Hotel and Tourism Association (CHTA) cu ta CHIEF Conference. CHTA ta honra esunnan cu ta un ehempel excelente den e industria di turismo y hotel. Miembro di AHATA, esta Bucuti & Tara Beach Resort a ricibi e Caribbean Hall of Fame Award pa practicanan sostenibel y Berlinda Engelhardt ganado di e AHATA Excellence Awards 2018 a gana e premio di Empleado di aña di Caribe 2019.

E premio di empleado di aña ta reconoce un empleado di hotel of turismo den e sector priva cu tin un averahe halto di habilidad tecnico como hospitalidad. Berlinda Engelhardt di Renaissance Aruba Resort a biaha pa Miami y a sorprend’e ora a menciona su nomber como e ganado. Coleganan di Engelhardt y AHATA a wanta esaki secreto te na ultimo momento. Ta un logro grandi pa Aruba, pasobra tabatin nominadonan for di henter Caribe.

AHATA ta felicita staff y personal di Bucuti & Tara Beach Resort cu e Hall of Fame Award y Berlinda Engelhardt cu su premio di Empleado di aña di Caribe 2019. Nan ta un role model pa tur cu ta traha den e industria turistico na Aruba y cu ta contribui diariamente na e exito di nos isla. E premionan aki ta reconoce nan compromiso den e industria mas aya di Aruba.  

Ken ta Berlinda Engelhardt

Berlinda Engelhardt ta traha na Renaissance Aruba Resort & Casino desde aña 2007. El a cuminsa como host den casino y den 1 aña di tempo a promove como concierge di hotel. Awo e ta Supervisor di Lead Guest Experiences. Su habilidad ta laga e huespednan sinti nan mes bon bini y na cas. A crea relacion largo cu e bishitantenan. Durante añanan Berlinda Engelhardt a ricibi premionan pa su compromiso y desempeño.