Den capacidad aereo Crecemento di casi 9% for di Merca te cu September 2015

ORANJESTAD, Aruba -November 2015: Durante reunionnan cu e diferente aerolineanan Mericano cu ta bishita nos isla a repasa e desaroyonan y sondea e plannan pa futuro di nos isla y tambe posibilidadnan di e rutanan cu mas ta frecuenta Aruba. E tipo di reunionnan asina ta sosode cu regularidad y ta forma parti di e strategia di Aruba pa mantene nos bon relacion cu partnernan importante den e industria turistico.

E delegacion di Aruba a consisti di Aruba Tourism Authority representa pa Ronella Tjin Asjoe-Croes, den su calidad di C.E.O. compaña pa e C.M.O. di A.T.A. Sanju Luidens-Daryanani. Ministerio di Turismo tabata representa pa Marisol Sanchez, James Hepple C.E.O. di AHATA a representa Aruba Hotel And Tourism Association, mientras cu James Fazio C.E.O. di AAA y Jo-Anne Arends Head of Airline Marketing di AAA a representa Aruba Airport Authority.

A tene reunionnan intenso y fructifero cu ehecutivonan di Delta Airlines, United Airlines, Southwest Airlines, American Airlines y jetBlue pa asina toca temanan importante y sondea diferente opcionnan pa Aruba.

Ronella Tjin Asjoe-Croes a indica cu ultimo añanan Aruba a conoce crecemento riba crecemento pa loke ta capacidad aereo y e temporada di winter cu ta na caminda ta mustra e mesun tendencia aki.

Delta Airlines kende ta un partner clave y ta domina e ruta y mercado di entre otro Atlanta a repasa e diferente resultadonan positivo pa loke ta e periodo tras di lomba y duna di conoce cu lo repasa posibilidadnan pa cu uzo di avionnan di mas capacidad riba e ruta di Atlanta, teniendo na cuenta e peticionnan y demanda pa e destinacion Aruba, cu ta sigui aumenta. Ehecutivonan di e aerolinea y Delta Vacations a confirma cu Aruba ta un destinacion popular y gusta. Ademas Delta Vacations a indica cu e promedio di prijs diario pa camber na Aruba a bin ta creciendo for di 2014 compara cu 2013 y na 2016 compara cu 2015, cual ta indicativo pa e demanda y tipo di demanda tambe; esnan interesa den Aruba ta dispuesto pa paga mas. Esaki sigur ta completamente alinea cu e aerolinea cu ta captura e oportunidad pa hisa su ganashi riba e ruta di Aruba. Asina Aruba ta keda un negoshi atractivo.

Southwest Airlines, e aerolinea cu a aumenta vuelonan den transcurso di aña cu hopi exito tambe a re afirma Aruba su popularidad, y a confirma cu Aruba como e prome destinacion den internacional pa e compania ta sigui mustra resultadonan positivo. Aruba a indica cu entretanto Southwest ta lidera diferente mercado den Merca y a haci posibel cu Aruba a crece diferente regionnan den e mercado entre otro e region west. Lo trata na wak si por anadi mas capacidad riba entre otro e ruta di Baltimore pa e temporada di winter 2015-2016.

Pa loke ta American Airlines aunke cu e aerolinea a pasa den varios cambio drastico, manera entre otro e ‘merger’ cu US Airways (por cierto for di october US Airways no ta existi mas y ta cay awor bou di American Airlines), awo e aerolinea lo ta enfocando mas riba mercadeo y benta despues cu a duna hopi atencion na entre otro aspectonan logistico di e ‘merger’. Lo sigui traha estrechamente cu American Airlines riba entre otro e mercado di Miami cu lo conta cu dos vuelo diario e temporada di winter 2015-2016.

Pa loke ta United Airlines, aki tambe ta satisfecho cu Aruba y a indica cu Aruba mester simplemente sigui haci locual el a bin ta haci. Enfoke special lo bay riba entre otro Newark y Houston pa e lunanan di verano.

Por ultimo a reuni cu jetBlue kende a categorisa Aruba como e ‘goldstar di su destinacionnan’. Tambe a indica ‘everything is better in Aruba’. Sigur un relacion sumamente exitoso cu ta sigui desaroya positivamente cu entre otro introduccion di e producto ‘Business Class’ weekend ultimo, cu ta carga e nomber di ‘Mint’. Aki lo sigui traha riba posibel introduccion di Fort Lauderdale como un ruta nobo di jetBlue pa Aruba.

Aruba a cosecha un crecemento hopi positivo aña pasa, di riba 3% for di Merca y pa e aña aki te cu september a nota un crecemento di 8.7 porciento. Aruba ta sigui ta den demanda y esaki aerolineanan a subraya ora a papia di ‘forward bookings’ esta locual tin na bookings caba pa e lunanan na caminda. Pa otro aña tin un meta pa sigui crece e mercado di Merca cu 6% y nos socionan aereo ta esencial den esaki. Kier sigui crece den e mercadonan primario como tambe diversifica den e mercado di Merca mes.

Te cu awo por mira un crecemento den capacidad aereo di Merca di 2% pa e temporada di winter 2015-2016 (te cu april otro aña). Ta calcula cu, cu e diferente upgrading di avionnan cu a discuti, cu esaki lo por incrementa na 4% compara cu e mesun temporada winter 2014-2015.

Trabou den ekipo cu entre otro esnan cu a asisti e diferente reunionnan ta keda instrumental y ta cay den masha bon tera. Esaki ta wordo reforsa aki na Aruba cu e plataforma di e ‘airlift committee’ cu ta consisti di e partidonan ariba menciona como tambe ‘Department of Civil Aviation’.