Artistanan lokal un biaha mas koperando en grande
Willemstad – Djabièrnè dia 7 di febrüari 2020 Curaçao Lions Club a tene un happy hour kaminda a reuni ku e artistanan lokal ku ta partisipá den e di tres edishon di ART X.
ART X ta un festival di Arte kaminda bishitantenan por apresia diferente tipo di arte. Esaki ta tuma luga dia 28 di mart pa 7or di anochi. Pa e anochi aki Curaçao Lions Club ta kombertí nan kas, Landhuis Klein Kwartier, den un berdadero galería di arte.
E festival ta kulminá den un subaste di arte (art auction) kaminda tin mas di 20 artista lokal ta partisipá ku diferente sorto di arte, komo por ehèmpel kuadro, eskultura i/òf arte di potrèt. Den e di tres edishon aki, bishitantenan no por solamente “bid” riba arte físiko, pero tambe riba eksperenshanan artístiko (art experiences), manera entre otro workshops di pinta kuadro pa un grupo, workshop di baile pa un grupo, siña bula drone i/òf asta riba un pintura riba muraya (mural painting) pa sea bo kas of ofisina.
Ku e di tres edishon di e festival di arte “ART X”, Curaçao Lions Club ke sigui trese eventonan diferente pa rekoudá fondo pa nan proyektonan ku ta nesesario den nos komunidat. Ta bai tin piesanan di arte di diferente artista renombrá manera entre otro Ariadne Faries, Marlies Schoenmakers, Phillipe i Giovani Zanolino, Papy Adriana, Carlos Blaaker, Giovanni Abath i Michèle Russel-Capriles. Pa un lista kompletu di tur e artistanan partisipante den e subasta, bishita nos website: www.artxcuracao.com
Manera kustumbrá nos por konta ku den e evento aki tambe Curaçao Lions Club lo trese un inovashon ku ideanan diferente. Ademas di e 20 artista lokal ku ta partisipá den e subasta, a skohe pa invitá 5 yu di Kòrsou prominente den nos komunidat pa tambe partispá na e subasta na un manera diferente. E sekshon aki ta titulá “Paint for a Cause” òf Pinta pa un bon kousa. E benta di e piesanan di arte aki tambe ta bai na benefisio di e totalidat di ART X. Ta trata aki di:
- Giselle Mc. William Minister di Desaroyo Ekonómiko
- Maurits de Kort Vise Presidente di Korte Superior
- Gilbert Martina Direktor di Curaçao Medical Center
- Liane Virginia – Cova Direktor di ADC
E aña aki Curaçao Lions Club a skohe pa hasi un donashon na Curaçao Children’s Museum komo kontribushon na e proyekto pa realisá un patio di rekreo inklusivo (inclusive playground) for di e fondonan ku rekoudá durante di Art X. Un patio di rekreo inklusivo ta hasi posibel pa muchanan ku un limitashon òf deshabilidat tambe por djòin otro muchan i disfrutá i rekreá huntu.
Karchinan pa ART X ya ta na benta na Antraco Schottegatweg, Albert Heijn Zeelandia i por hasi pedido tambe riba e facebook page www.facebook.com/artxcuracao. Karchi ta kosta solamente ANG 150 pa persona i klaramente e intenshon ta pa ban kumpra arte pa sea dorna bo kas òf ofisina.
Sigui tur informashon di ART X via facebook i keda pendiente ta ken ta bai ta e artistanan lokal ku ta bai akompañá e invitadonan.