Dia 04 sèptèmber próksimo Arnell i su Orkesta lo selebrá 30 aña den farándula di Kòrsou. I esaki nan kier selebre ku nan pueblo ku a bin ta sostené nan. Huntu ku e selebrashon aki nan kier kompartí ku sra. Mafalda Minguel tambe a kumpli dia 11 yüni, 63 aña den farándula di Kòrsou.

Durante di e rueda di prensa ayera tardi na Because nos por a kompartí ku Arnell a selebrá 42 aña, Sherman 45 i Carlos ta bai selebrá 40 aña den farándula. Ta un selebrashon grandi lo bai tin sigur pa ku e okashonnan aki.

Tambe nos por a komprondé ku e piesa “Mango” a wòrdu komponé pa sr. Virgilio Sillie 30 aña pasa, ku a bira un hit tantu lokal komo internashonal. Un piesa ku a dura tres siman riba billboard na Merka. Arnell Salsbach a hasi menshon ku e nòmber Arnell i su Orkesta ta un idea di Mocky Job.

Dia 03 sèptèmber lo bai tin un selebrashon pa Kòrsou, grátis na Hòfi Fidel. For di 12’or di mèrdia te ku 8’or di anochi. Lo bai tin animashon di Arnell i su Orkesta i huntu ku nan pa animá e tremendo selebrashon aki Típiko Pasa Bon, Kaha di Òrgel di Winchi Martha, Dj Chio, Karimbo, SP i XD. I hopi sorpresa mas.

Lo bai tin un kushina i bar hopi bon surti !! Pues famia Salsbach i tur e músikonan di Arnel i su Orkesta ta warda boso pa asina bin selebrá ku nan na Hòfi Fidel dia 03 di sèptèmber.