Willemstad– Hasi huntu riba nos mes! Esei ta lema di Appeltjes van Oranje pa 2016. Ku esaki Oranje Fonds ta premia tres sentro di enkuentro eksitoso ku ta manehá pa boluntario. Tur aña Reina Máxima, protektor di Oranje Fonds, ta entregá e Appeltjes van Oranje. Tur organisashon por apliká te ku dia 25 di sèptèmber di 2015 via www.oranjefonds.nl/appeltjes.

E aña akí Oranje Fonds ta pone atenshon ku Appeltjes van Oranje na sentro di enkuentro bou di maneho propio. Ronald van der Giessen, direktor di Oranje Fonds, ta bisa: “Mas i mas nos ta mira ku hende di bario mes ta aseptá e reto i ta kuminsá ku un sentro di enkuentro den nan pueblo òf bario riba nan mes. Nos ta buska inisiativa asina ku a logra gran éksito. Ta importante pa no ta e direktiva so, sino tambe e maneho diario i e programashon ta den man di boluntario. I ku tin aktividat pa henter e pueblo òf henter e bario. Pensa por ehèmpel riba hende ku huntu ta kuminsá ku un sorto di toko sosial, un sentro di bario, lugá pa mucha hunga, pa hende por sinta lesa korant òf buki i bebe un kòpi di kòfi, òf ku ta manehá kualke otro sorto di fasilidat komun. Nos ta spera hopi inskripshon!”

Appeltjes van Oranje ta e premio anual di Oranje Fonds pa inisiativa ku ta komuniká diferente grupo di hende ku otro di un forma eksitoso. E premio ta konsistí di un imahen di bròns ku Prinsesa Beatrix a traha, i un montante €15.000. Den mei pa di dieskuater biaha Reina Máxima lo entregá e premio na tres ganadó. E aña akí tambe pueblo lo por vota pa su favorito durante e siman di voto den desèmber.

Oranje Fonds tur aña ta sostené mas ku 7.500 inisiativa sosial na Hulanda i den e parti di Reino den Karibe ku plaka, konosementu i kontakto. E aña ku a pasa a aportá € 27,4 mion na diferente inisiativa ku a sòru pa hende topa ku otro, ta menos solitario, tin komprenshon pa otro i ta hasi esfuerso pa yuda otro. Oranje Fonds ta haña sosten di e.o. Nationale Postcode Loterij, Lotto, i di Amigu i empresa. Rei Willem-Alexander i Reina Máxima ta e pareha protektor di Oranje Fonds for di su inisio.