Djabièrnè awor lo tin e apertura ofisial…

WILLEMSTAD.- Espektativanan pa apertura di Interpark, e parke di dibertishon na Sambil ta sumamente haltu, pero a surgi un kontratempu chikí pa loke ta trata instalashon di un dje aparatonan ku lo ta e atrakshon mas grandi di e parke, esaki a pone ku lo tin ku posponé e apertura.

Ayera nochi Showbizz International, promotornan di ‘Interpark’ a tuma e desishon di posponé e apertura di e parke di dibertishon debí ku mester kaba di harma e ‘Montaña Rusa’ i e organisadónan ke habri e parke ku tur e weganan kla pa wòrdu usa.

‘Mi ta preferá pa tur e ekipo ta kla pa públiko por usa i nos no ta kla ku e ‘Montaña Rusa’ i mi ke pa esaki ta kla pa e apertura. Despues di reuní ku e direktor di ‘Interpark’ nos a tuma e desishon pa posponé e apertura te djabièrnè. Pa djabièrnè nos lo ta kla ku instalashon di e ‘Montaña Rusa’ i lo habri e parke ku tur e weganan kla pa usa’, asina Steve Hudson, direktor di Showbizz International a splika.

Pueblo di Kòrsou ta keda invitá pa djabièrnè awor, 21 di yüli 2017 pa e grandioso apertura di Interpark pa 6’or di atardi na Sambil.