Campeon Mundial di beach tennis, Alessandro Calbucci a duna clinica

Oranjestad – November – Renaissance Private Island ta ofrece hopi mas cu simplemente relahamiento. E isla priva di Renaissance Aruba Resort awor ta figura un veld di beach tennis nobo.  Despues cu a presenta nan ‘Flamingo Bar’ den un concepto innovativo, recientemente a realisa apertura di e cancha di beach tennis nobo. Esaki mesora ta hiba e Renaissance Private Island na un otro nivel. Trabaonan intensivo a tuma lugar pa asina yega na modelo di un cancha di beach tennis profesional. E deporte di beach tennis a bin ta crece enormemente durante añanan, esaki mes ta un di e motibonan cu Renaissance Private Island a dicidi pa drecha y mehora nan cancha pa ofrece nan huespednan un cancha na nivel profesional.
Pa haci e apertura special a invita campeon mundial di beach tennis, Alessandro Calbucci pa ofrece un clinica priva di beach tennis exclusivamente pa tur huesped di Renaissance Aruba Resort & Casino. E cancha nobo ta amplio y moderno unda 2 team por hunga banda di otro. Ademas di e cancha di beach tennis, Renaissance Island ta finalisando beach cabanas priva cu servicio di ‘butler’ exclusivo. Tambe a agrega algun actividad pa mucha, manera un ‘beach swing’ den e lama cristalino di Renaissance Private Island. Huesped di Renaissance Island awor por haci uzo di e cancha di beach tennis tur dia completamente gratis for di 8’or pa 10’or di mainta, pa esaki mester inscribi na e booth di Res Sail Sports riba Renaissance Island mes.
Aruba Beach Tennis Open

E competencia di beach tennis mas grandi na mundo lo tuma lugar aki na Aruba – te cu 20 di November proximo na Eagle Beach. Durante un siman completo Aruba lo ta e sede di e competencia mundial aki. Beach tennis ta un di e deportenan cu mas ta creciendo y Aruba ta e prome isla den Caribe cu a habri man y carga e competencia mundial. E competencia aki ta esun di mas grandi y conoci den e mundo di beach tennis y ta atrae miles di bishitante, deportistanan tanto profecional y amateur pa presencia y competi. E organisacion ta sperando di por kibra e record di participacion di aña pasa. E aña aki lo bay tin participantenan di Argentina, Aruba,  Australia, Austria, Belgica, Boneiro, Brazil, Canada, Curaçao, Francia, Alemania, Guadaloupe, Italia, Hulanda, San Barthélemy, Sint Maartin (Frances), Slovenia, Spaña, Merca y  Venezuela. E gran evento lo tuma lugar ariba 35 cancha na Eagle Beach cu ta haci’e sigur e competencia di beach tennis mas grandi na mundo! Pa mas informacion por bishita Renaissance su pagina di Facebook, www.facebook.com/RenaissanceAruba/events.