Pa motibu di e pandemia di corona vìrús, Fundashon JAG a hañele obligá pa pospone e aktividat pa ku entrega di premio di karnaval 2020 te ku un próksimo aviso.

Despues di e anunsio aki direktiva di Asosashon di Gruponan di Karnaval Kòrsou (AGKK) a keda aserka pa diferente líder di grupo di karnaval indikando ku tin un rumor ta sirkulando ku resultado di premiashon ya ta konosí serka algún persona. Direktiva di AGKK a desmentí esaki kategorikamente debí ku e resultado ta den un envelòp seyá serka e presidente di hurado.

Lastimamente ku e rumor aki a trese hopi konflikto i diskushonnan sin sentido entre lídernan di grupo i nan miembronan.  

Despues di a evaluá e situashon ku a presentá lídernan di grupo di karnaval konhuntamente ku direktiva di AGKK a tuma e desishon i a bai di akuerdo ku e proposishon, pa anunsiá e resultado di premiashon vía medionan di komunikashon pa’sina evitá mas spekulashon i frustrashon. E desishon aki lo wordu ehekutá djasabra 2 di mei próksimo.

Pa loke ta trata ehekushon di e anunsio, AGKK a start ku un proseso pa analisá e diferente posibilidatnan i e forma ku esaki lo por tuma lugá. den transkurso di siman, nos lo informá esaki. 

Direktiva di AGKK