Djaluna 9 di desèmber 2013 Minister Jeanne-Marie Francisca di Ministerio Desaroyo sosial, Labor i Bienestar den kompania di e famia di Biblioteka Nashonal Kòrsou Frank Martinus Arion a anunsiá e di dos siman di luna di desèmber komo siman di héroenan Nashonal. Minister Francisca a splika ku ta krusial den e etapa di kresementu di nos pais, pa nos dediká tempu i atenshon na nos héroenan nashonal i nos baluartenan. Pasombra nan obra i nan logronan ta parti di nos memoria. E memoria di trabou desinteresá, esfuerso i balentia aki, ta forma parti di nos historia, i pa nos sigui pa dilanti i logra nos metanan komo pais, nos mester di nos historia. Promé ku a desvelá e bòrchi konmemorativo, Minister Jeanne-Marie Fransicsa a bisa klaramente ku riba e bòrchi tin vários nòmber di personanan ku di un òf otro manera, meresé un rekonosementu di hinter nos komunidat. Esei no ta nifiká ku nan a ser deklará komo un héroe nashonal, pero si, ku nos a kòrda riba nan aporte na nos pais, riba e dia spesial aki. E bòrchi lo keda kologá na nos Biblioteka Nashonal Kòrsou, ku ta un instituto klave den e proseso di konservashon di nos memoria i nos historia komo pais. Segun Sra Gerda Willems direktor di Biblioteka Nashonal Kòrsou: “Durante nos bida hopi biaha otronan ta bisa nos ken ta nos héroenan. I no ta tur biaha nos ta para ketu o sufisiente na nos propio héroenan i den kaso aki hasta di nos pais. Tur komunidat tin héroenan. Pa mira nan nos mester interesá pa para ketu, wak bon i haña nan, esun ku ta hasi e diferensha, no e lokual nan ta logra o duna di nan mes so o den otro kaso nan kreashon pero mas importante nan lucha, nifikashon di nan trabou masha balioso i porta den sierto kaso hasta sakrifisio nesesario. Mi ta spera ku awe nos ta marka e momento pa nos enkontra den nos kada unu un héroe patriótiko ku e pais aki mester, yena ku kompromiso i dedikashon pa lucha i realisá soñonan ku lo mihó pa nos hendenan i pa pone nos Kòrsou komo pais kaminda e mester ta. I ku na e mesun momento nos ta sostené otro di bèrdat komo ruman sin wak ta ken òf no, den realisashonnan di meta nesesario pa nos pais komo ku sosten aktivo inkondishonal ta otro akshon heroiko ku tambe un pais mester di nos kada unu ku ta parti importante di Kòrsou. Laga e mainta aki ta un inspirashon fuerte, pa mas forsa pa kuminsá o sigui e lucha ku nos pais Kòrsou mester”. Minister di Desaroyo Sosial, Labor i Bienestar Sra. Francisca a pidi pa laga nos kaba e aña 2013 ku e sentimentu di pas i perseveransha pasobra den tur proseso di kreashon di nashon, tin ku pèrdè bataya chikitu, parker renkor, odio i vengansa, pa na final nos gana , komo hende, komo komunidat i komo pais. Ta di e manera ei so, nos lo por paga e debe di gratitut ku nos tin pa ku nos Héroenan Nashonal.