Antillean Adventist Hospital ta prolongá su akuerdo di penshun ku ENNIA. Pa Advent,  kuido di komunidat  ta un karakterístika importante. Esei ta kuminsá na su mes hendenan, e personal di Advent ku mester duna e kuido akí na komunidat. E kondishonnan di trabou huntu ku un bon penshun di behes pa bida largu ta kuadra kompletamente ku mishon di Advent. Riesgo di fayesementu di e empleado i kuido di e famia tambe ta inkluí den e areglo di penshun.

Den e trayekto di revishon di e akuerdo,  Henriquez & Vornis Insurance Consultancy a intermediá na nòmber di Advent. E bon relashon ku ENNIA ta eksistí fo’i 2002 kaba i esaki sigur sigur a kontribuí na finalisashon  éksitoso di e trayekto. “Nos hendenan ta traha ku pashon pa nos klientenan ku ta bini akinan pa kuido, i ku mésun pashon nos ta kuida nos hendenan. Mas ku klaru ku un bon areglo di  penshun  ta parti di esaki i mi ta hopi kontentu ku nos a regla esei atrobe ku nos kompania di seguro ENNIA”, sigun Cenaida Panneflek, Chief Executive Officer di Advent.