Djabièrnè dia 18 di òktober Kas di Kultura ku  estrecho koperashon di e konosido sinfonista Sr. Jules Marchena  a ripití e aktividat ‘Anochi Musikal Literario’. E aktividat  a tuma lugá  di 7’or pa 9’or di anochi na Kas di Kultura, riba waf, patras di Galeria di Kas di Kultura. Meta di e aktividat ta pa promové i duna realse  na kultura di Kòrsou en general i partikularmente na músika i literatura, pero tambe pa sera konosí ku ‘músika di sinfonia di boka’. ‘Músika di ‘sinfonia di boka’ a keda presentá  pa Jules Marchena i Los Sonfonistas. Djabièrnè dia 14 di yüni di e aña aki Kas di Kultura ku estrecho koperashon di Sr. Jules Marchena a organisá  e aktividat aki pa di promé biaha. Dia 14 di yüni tabata un anochi musikal ku a hala hopi bishitante, ku a gosa inmensamente di diferente presentashon den airu liber i a ekspresá nan deseo pa Kas di Kultura organisá  ku mas frekuensia tipo di eventonan  asina. Esaki ta hustamente e motibu ku Kas di Kultura huntu ku Sr. Marchena a trese un presentashon di e “Anochi Musikal Literario” den òktober den e mesun forma un biaha mas. Sr. Ali Inecia , mihó konosí komo “Tio Ali”  a dirigí e anochi  agradabel i ameno aki. Tabata tin presentashon musikal di Los Sonfonistas, poesia i kuenta di sra. Lucille Berry- Hasseth,  kuenta di sr. Caiviany Eleonora i presentashon di baile di 3 pareha ganadó,  partisipante  den e kompetensia di baile, organisá pa  Skol di  Baile SKOBA ku a tuma lugá den sèptèmber último  di e aña aki, durante klousura di ‘Siman di Kultura’. Banda di esaki Sr. Jules Marchena a presentá ‘solo’, ku tres piesa klásiko riba su sinfonia di boka i su kitara simultáneamente, un arte musikal  impreshonante ku awendia bo no ta mira hopi mas. Riba waf, patras di Kas di Kultura a resultá un espasio ideal pa tipo di aktividatnan asina. No solamente pa e logístiko e.o un podio ‘natural’ grandi ku por akapará diferente aktividat pareu, pero tambe pa e ambiente speshal  ku e espasio mes ta krea. Nos ta papia aki di un bista bunita di barku di fruta na waf, bista di nos haf,  airu liber, bientu di laman  i tambe e edifisio di Kas di Kultura, un monumento històriko, ku su fachada  di Kas Kolonial ku a trese un ambiente kaminda tur nos bishitantenan por a disfrutá di e programa di e anochi. Seguridat pa outo di bishitantenan tambe tabata garantisá ya ku por a parker riba waf mes, pabou di e espasio kamminda e aktividat a tuma lugá. Di e manera aki Kas di Kultura ta sigui  kumpli ku su tarea di stimulá i promové konsiensia kultural riba diferente tereno. Kas di Kultura ke yama un danki speshal na CPA/ MCB ku a koperá i hasi posibel ku Kas di Kultura por a usa waf pa trese mas kultura pa pueblo di Korsou. Kas di Kultura ke hasi un yamada na pueblo di Kòrsou pa bini ku idea kreativo i aktividat  ku ta kuadra ku e maneho di Kas di Kultura, pa huntu nos trese mas Kultura, e motor pa desaroyo duradero.