Diamars anochi a tuma luga un anochi informativo pa tur e artistanan cu lo kier forma parti di e proyecto di arte publico na San Nicolas yama Aruba Mural Projects. Cu un entusiasmo y interes grandi artistanan di nos isla a topa na Scol di Arte pa tende un poco mas di e proyecto.
Un di e artistanan cu tabata presente na e anochi informativo aki ta e conocido Mo Mohamed. E ta urgi e publico amante di arte pa brasa e proyecto aki. E ta comenta cu e presentacion tabata uno magnifico. Sr. Mohamed ta bisa: “AMP lo ilumina San Nicolas. Na e momento aki mi ta ocupa cu varios proyecto simultaneo cu ta impedi mi participacion, pero mi ta sostene e proyecto. Nos mester di e entusiasmo di hobennan manera mi ta mira den e proyecto aki, cu ta trece ideanan fresco y mas importante busca forma pa e ehecutanan.” E ta sigui comenta cu durante e anochi a topa cu hopi cara nobo di artistanan hoben cu hopi potencial. Sr. Mohamed ta finalisa bisando “Esaki ta mustra cu Aruba ta rico na talento y nos mester brasa e oportunidad cu Aruba Mural Projects ta trece cu ne.”
Durante e anochi informativo artistanan presente por a cera conoci cu e proyecto y ki e vision ta pa e murayanan na San Nicolas y a ricibi tambe informacion general di participacion. Intencion ta pa e artistanan cu tin un pasion pa arte y cultura di nos isla, pa nan participa den Aruba Mural Projects y traspasa conocemento na nos futuro generacion.
Armando Goedgedrag ta un otro artista conoci cu tabata presente. Locual a sobresali di e presentacion segun Goedgedrag ta, e union entre artistanan pa ehecuta e proyecto aki. Sr. Goedgedrag ta comenta: “Den cultura di Aruba, arte ainda tin un espacio chikito. Pa mira e interes y colaboracion entre artistanan ta algo hopi bunita. E ta un momento cu por contribui na futuro artistanan, pa mustranan kico bo por haci cu bo talentonan y creatividad. E ta un oportunidad tambe pa trece padilanti bo originalidad, crea algo unico pa bo isla.”
Otro siman ta bay tin un exposicion di Aruba Mural Projects, unda e participante hobennan cu ta formando parti di e proyecto ta demostra tur locual nan a siña den e prome tayer di AMP. Riba e mesun anochi aki lo haci e seleccion oficial di e artistanan cu ta bay forma parti di Aruba Mural Projects. E proyecto ta hayando hopi atencion y comunidad completo ta ansioso pa mira e artenan riba e murayanan na San Nicolas.
Por sigui e desaroyo di Aruba Mural Projects di cerca riba nan pagina di Facebook/ARUBAMURALPROJECTS.