Willemstad, 3 di òktober 2017 – Den un sala yen di invitado, miembro i senador, JCI United Citizens of Curaçao (JCI UC) a tene su anochi di elekshon kaminda a elegí hunta di direktiva pa 2018. Kandidatonan elegí pa Hunta di Direktiva di JCI UC pa aña 2018 DLPR: Kennen Elvilia (Vise Presidente), Janice La Bast (Sekretaria) , Vanja Wanga (Presidente), Priscilla Tyrol (Tesorero)

E anochi tabata unu sumamente spesial kaminda JCI UC tabatin e honor di por a risibí e vise presidente di JCI asigná ku e area di Karibe, señor Chris Curtola, kende a bini direktamente for di Canada pa kondusí su bishita ofisial den Karibe. Durante di anochi señor Curtola a duna un spich di motivashon i enfoká riba e importansia di motivashon propio pa traha na bienestar di nos komunidat. Tambe tur presente por a disfrutá di diskursonan prometedor di e 4 kantidatonan (Prisila Tyrol – Tesorero, Janice La Bast – Sekretaria, Kennen Elvilia – Vise Presidente i Vanja Wanga – Presidente) ku a postulá nan mes pa e hunta di direktiva pa aña 2018. Na momentu pa di elegí, tur kandidato a risibí sosten unanimamente pa tur miembronan presente e anochi aki.

E hunta di direktiva a elaborá riba nan vishon pa otro aña i a pone énfasis riba desaroyonan na bienestar di e organisashon. E presidente elegí pa 2018 a pone atenshon riba importansha di krea i hasi e identidat di e organisashon fuerte i tambe nesesidat di mas miembro den futuro serkano. Junior Chamber International (JCI) ta un plataforma di hóben entre 18 pa 40 aña ku ta traha komo boluntario pa trese un impakto positivo na mundu. JCI UC kual ta 1 di e 9 kapítulonan di JCI Dutch Caribbean tambe tin e mishon aki i a bin ta hasi esaki pa 9 aña largu pa medio di proyektonan duradero basá riba nesisidat di nos komunidat.

Pa por sigui kumpli ku esaki, nos ta en buska di mas suidadano aktivo entre 18 pa 40 aña ku ta dispuesto na krea un impakto positivo den komunidat i  na mes momentu atkerí konosementu den diferente area tantu personal komo profeshonal. Tur persona interesá por sigui nos via Facebook JCI United Citizens of Curaçao òf tuma kontakto ku nos na jciuccuracao@gmail.com. JCI UC kompletu ta felisitá e hunta di direktiva di 2018 i ta deseá nan tur klase di éksito pa e aña binidero. #UCSTRONG