WILLEMSTAD — Direktiva di AMAK a risibí un kantidat di reakshon di parti di mundu farandulero riba e proposishon di lei ku Minister dr. Jose Jardim sostené pa Parlamentario drs. Glenn Sulvaran tin pa eliminá O.B. (Omzet Belasting), riba Eventonan Musikal Internashonal grandi ku ta keda organisá aki na Kòrsou.

Direktiva di AMAK ta di opinion ku e proposishon aki ta bon, pero mester amplia esaki ku eventonan kultural grandi manera Karnaval i Festival di tumba, kaminda nan tambe mester keda eksonerá di e peso di grandi di O.B.,

Ta bon pa menshoná aki, ku Gobièrnu no ta supsidiá Festival di Tumba, sin embargo, 20% di e entradanan brutu di Festival di Tumba ta bai den Kaha di Gobièrnu pa motibu di e peso di e O.B. Esaki ta tresiendo eksistensia di Festival di Tumba na peliger.

Komo ku Festival di Tumba ta keda bishitá tambe pa diferente hendenan ku ta bini djafó, pero tambe e pueblo komun i ku tin e entrada mínimo ku ta gusta su festival di Tumba. Pa e motibu ei no por hisa e preis di entrada sin mas.

Si nos analisá karnaval den su totalidat, nos ta mira ku aki gruponan ta invertí un kantidat grandi di sèn pa nan por duna Kòrsou un espektákulo grandi, pero komo kiera ku no tin ningun insentivo di parti di Gobièrnu, kada aña di nobo e kantidat di gruponan ta sigui baha. Durante e último dékada, e kantidat di grupo nan ku ta partisipá den Marcha a keda redusí ku mas di 50%.

Pa e motibunan aki, na opinion di Direktiva di AMAK, un eventual eliminashon di OB pa tur loke ku tin ei haber ku Karnaval manera material ku ta keda importá pa traha i eliminashon di OB riba tur aktividatnan pa krea fondo, lo kontribuí pa engrandese nos karnaval.

E periodo di karnaval i Festival di Tumba ku ta dura entre 6 pa 8 a 10 siman, tin un efekto masha grandi riba nos ekonomia, ya ku ta un kantidat grandi di sektor den nos komunidat ta haña un entrada for di tur eventonan di karnaval.

Direktiva di AMAK ta kere ku ta na su lugá pan a mesun momentu ku ta bai entrega e proposishon di lei aki pa inkluí aktividatnan grandi kultural i di temporada karnaval den e pakete ku no mester paga O.B., entrante 1 di yanüari 2015.

Direktiva di AMAK ta sigur ku Parlamentarionan di tantu koalishon i oposishon lo duna importansia na kresementu di nos karnaval i eventonan kultural grandi, dor di duna nan sosten e proyekto di lei aki, ku e kambionan ku AMAK ta proponé.

Direktiva di AMAK ta spera sinseramente ku despues di hopi aña ku nos a boga pa e kambionan aki, porfin esakinan por bira un realidat. Ban kuida nos kultura, e ta di nos.