Willemstad – Preparashonnan ta den “full-swing” i e entusiasmo ta haltu pa presentashon di Claudius Philips dia 7 di Juni awor den Landhuis Brievengat. For di awor tur kos ta indiká kaba ku I LOVE DANCING, lo bira un fiesta hopi Diferente, tremendo i dushi. E banda lokal TUNE, ku a konsiderá e oportunidat aki hopi importante pa nan, ya ta start ku esnayonan e siman aki. Konsiderando e animo i interes haltu ku tin pa e fiesta di Claudius Philips den Landhuis Brievengat, TUNE k’é probecha pa duna un tremendo presentashon. Tur kos ta indiká ku Amos Balentien tei dirigí TUNE dia 7 di Juni den Landhuis Brievengat, komo ku tur Tico Libiee i Urvin “Luwi” Jano lo no ta den “front” di TUNE, debi ku nan a opta pa bai un presentashon na Ulanda. Gerensia di TUNE sinembargo a tuma e oportunidat pa presenta ku Claudius Philips hopi na serio i komo tal TUNE lo presentá Amos Balentien, Benoni “Tico” Balentien, Igmar LaReine i Jill Frans. Pa fiesta ku O.R.E.O., TUNE tei presentá un repertorio variá ku lo tin nan eksitonan grandi di pasado i pero tambe hitnan di momentu. I pa loke ta Claudius Philips mes, Kòrsou por spera un piesa nobo e siman aki, di e gran talento Rubiano!
Claudius Philips ku piesa nobo!
Den e fin di siman ku ta tras di lomba, Claudius Philips a kaba di pone e toke final na un piesa nobo, ku tei kuminsá zona na emisoranan lokal. Despues di su último eksitonan grandi manera e Medley di Fernandito Villalona i e tremendo “Hòmber Sa Gaña?”, ta ora pa algu dushi atrobe pa bailado i fanatikonan di Claudius Philips. E piesa nobo, tambe lo ta den e repertorio ku Claudius Philips lo presentá Djasabra 7 di Juni awor den Landhuis Brievengat. Ademas i famoso i dushi “Lamunchi” tambe tei zona den I LOVE DANCING.
Karchinan VIP ta baiendo duru.
Karchinan pa e tremendo fiesta aki ta baiendo durisimo. Ya tur karchi “early birds” a “sold out” den apenas ún siman! I siendo ku ainda falta mas ku un luna promé ku Claudius yega Kòrsou. Ademas e interes pa karchi VIP ta hopi haltu. Ta bon pa bisa ku ta 100 karchi so lo tin pa VIP ALL ACCESS konsiderando ku mester tene kuenta ku lugar di parker paden i e kantidat di hende ku por bai riba e VIP stage. Pa tur informashon di VIP por yama 516 55 34. Pa loke ta karchinan general ya e promé “zending” ta na BEEP BEEP RIO, Mensing’s Caminada, Tik Tak Punda, De Heren Café na Zuikertuintje i na Pomp di gasolin Sta.Helena. Karchinan general den pre-benta ta kosta Fls 50,= i den kaso ku sobra karchi, entrada na porta lo bira Fls 60,= Pues buska bo karchi fo’i tempran i prepará pa bo baila Claudius Philips Djasabra 7 di Juni den Landhuis Brievengat.
