…Despues di Curaçao North Sea Jazz Festival…

WILLEMSTAD:- E ambiente tradishonal despues di CNSJ e aña aki un biaha mas ta na Renaissance Curaçao Resort den e asina yamá, ‘After Party’. E ambiente eksklusivo aki ta unu ku a bin ta hala hopi atenshon i e aña aki e no ta un eksepshon. Pa klousurá e popular CNSJ Festival ku un broche de oro, Renaissance Curaçao Resort ta tene su ‘After Party’ pa un i tur por siguí disfrutá den ambiente musikal despues di e konsierto di Djasabra. Ya pa algun aña konsekutivo Renaissance Curaçao Resort ta konosí pa ta brinda e mihó ‘After Party’ despues di Curaçao North Sea Jazz Festival kaminda un i tur por disfrutá di un enkuentro privá di e músikonan lokal i internashonal. Durante di e ‘After Party’ Jazz Pool ta ‘basilá’ i improvisá riba nan instrumèntnan i e aña aki lo no ta un eksepshon. Ademas di esaki lo tin presentashon bibu di DJ Questlove i DJ RO-1.  E ‘After Party’ lo tuma lugá mainta trempan dia promé di Sèptèmber di 1:30am pa 5:30am den lobby di Renaissance Hotel i karchinan ta optenibel na; Renaissance Front Desk, Beep Beep Rio Canario i Mensing’s Caminada na balor di NAF 55.00. Karchinan pa e evento aki ta limitá, pues e evento aki ta den un ambiente eksklusivo, pues no tarda pa kumpra bo karchinan.Riba imágennan athuntu un bista di e tremendo ambiente durante di e ‘After Party’ di aña pasá den lobby di Renaissance Curaçao Resort.