WILLEMSTAD — Festival di Tumba pa Karnaval di Kòrsou atraves di su 44 aña di eksistensia, a demostrá ku e ta un aktividat Kultural Musikal ku tin derechi di eksistensia. E festival aki a krese na kontenido i na nivel di organisashon. E final di Festival di Tumba ta eksihí aktualmente un produkshon di un invershon finansiero kuantioso i tambe di un envolvimentu di hopi profeshonal riba tantu e  tereno atministrativo komo tékniko. Direktiva di AMAK ta kontentu ku Festival di Tumba ta un di e poko plataformanan kaminda  nos artistanan por kompetí na un nivel asin a haltu ku haltu ku e ta kapta interes internashonal. Radio emisoranan i plantanan di televishon i medionan di komunikashon skibi, ta promové nos Festival tantu promé komo despues di e aktividat. Nos ta lamentá ku apénas 24 ora despues ku e aktividat aki ku tin asina tantu interes bou di tur gremio den nos komunidat, tin ku keda trata di un forma ménos elegante. Jump in ku Jump up nan a desemboká den kantamentu di road fire for di kuminsamentu te final. Nos Rei di Tumba danki Dios te ainda asta haña invitashonnan pa yega kanta su número ganador. Kiko ta pasa ku tur e tumbanan n bunita areglá, bunita kanta i ku un kontenido profundio ku a keda presentá djabièrnè dia 7 di febrüari den Curacao Festival Center? Nos ta elogiá ku tòg tin organisashonnan ku despues di Festival di Tumba tin kurashi nesesario pa bis anos bandanan ku nan mester toka nos tumbanan. Nos ta referí aki na entre otro Grupo WEPA, SVB i  Lions ku ta organisashonnan kual nos ta na altura di dje ku ta eksihí pa e gruponan musikal pa toka nos tumba no djies pa komplasé, pero kompartí integral di e anochi di e aktividat. Direktiva d i AMAK ta hasi un apelashon riba nos músikonan pa sigui toka nos tumba, pasombra si nos mes nota ta duna nos tumba e balor nesesario, aki poko dia nos no ta haña sufisiente Branding Partner , ni sufisiente medionan di publisidat ni sufisiente públiko pa akudí na nos Festival. Nos ta lamentá e gritu aki debí na tantísimo reakshonnan ku nos a haña di baidónan di jump up, di nos branding partnernan i tambe di e públiko ku ta paga nan sèn pa bin mira e festival den kua nos músikonan ta presentá. For di awor aki un apelashon di  direktiva di AMAK, pa durante e marcha di djadumingu awó i e marchanan ku ta sigui, kisas ku un eksepshon di e marcha di tener,  pa laga Tumba ta e plato prinsipal. Nos ke en realidat pa nos Festival di Tumba sigui krese? Palabra ta na nos músikonan lokal.