WILLEMSTAD — Den kuadro di e último desaroyonan ku a bin ta tuma lugá, kaminda a start un diskushon riba e pensamentu pa kobra Radio Emisora, Televishon i Sentronan di Fiesta un montante pa toka piesanan tantu lokal komo internashonal, direktiva di AMAK djaweps awor ta organisá un seshon di informashon, kaminda lo bai papia riba e tópiko aki.

Pa e okashon aki, AMAK a invitá Sr. Juny Sluis, eksperto riba e tereno aki, pa e ta e orador prinsipal riba e tópiko aki. Despues lo sigui un seshon di pregunta i kontesta.

E seshon di informashon aki lo tuma lugá djaweps awor dia 24 di mei 2018 di 6.30 pm pa 8 or pm, den Sala Newburn Patricks na Curaçao Festival Center.

Un invitashon ta bai na tur kompositor, tur músiko, pero tambe tur hende ku tin interes riba e tema aki, pa nan ta presente na e seshon aki, pasombra lo tin informashonnan balioso.

E pregunta ta: Kòrsou ta kla paga Royalties? Bini unu bini tur bin skucha, pero aportá ku bo granito riba e tópiko aki. Un boka bisa otro.

Direktiva di AMAK