WILLEMSTAD — Despues di kasi 2 aña ku Farándula tabata será, porfin Gobièrnu a eliminá tur e medidanan ku tabata stroba un bon desaroyo di esaki. Direktiva di AMAK tin hopi apresio pa tur e músiko i artistanan ku apesar di e situashon reinante relashoná ku e medidanan, tòg tabata hasi uso di nan kreatividat pa  hasi grabashonnan nobo i den algun kaso te hasta hasi presentashonnan konforme e reglanan stipulá.

E momentu a yega awor pa tur ku ta  metí den farándula, esta promotornan, doñonan di sitio, músikonan i artistanan, tur pa ban asumí e responsabilidat nesesario pa por keda mantené e sifranan di kontagio abou. Nos ta referí aki na e.o. puntonan di atenshon ku a bini dilanti durante e relato di dia di Gobièrnu , indikando ku mester keda tene kuenta ku tur e aspektonan di higiena i distansia sosial. Esaki ta nifiká ku mester tene kuenta ku lokual ta stipulá den e diferente pèrmitnan ku e lokalidatnan tin, pa no ta demasiado yen.

Ban spera ku Farándula den e situashon aktual lo por rekuperá bek i alkansá e nivel promé ku Covid 19 a hasi su entrada na Kòrsou.

Direktiva di AMAK