WILLEMSTAD – Direktivanan di AMAK, Curaçao Festival Center i Instituto pa Formashon Musikal, a tuma nota di algun publikashon ku no ta kuadra kompletamente ku e bèrdat.

Enbèrdat ta asina ku siman pasa outoridatnan di impuesto a pone kandal  1 porta di Ofisina den Curaçao Festival Center.  E ponementu di kandal aki tabata aparentemente pa motibu ku Instituto pa Formashon Musikal no a kumpli kompletamente ku pagonan fiskal. Motibu di esaki ta ku montante palabra pa supsidio pa Instituto pa Formashon Musikal no a drenta ainda, i esei a pone ku  e montantenan korespondiente no por a ser deposita na Ontvanger.

AMAK

Pa loke ta trata e organisashon di AMAK, ta bon pa menshoná ku tin un areglo entre e AMAK organisashon i Ontvanger pa mensualmente paga un suma riba impuestonan.  Ku esaki AMAK a kumpli kabalmente te na e momentunan aki. Pa lokual ta trata pagonan di OB, ta asina ku konforme un lei ku a Sali na 2015, AMAK durante dos aña largu a entrega e petishon pa eksonerashon di OB manera e ta preskribí den e lei. Te ku dia di awe AMAK no a risibí ningun reakshon riba ningun di e dos kartanan ku a keda manda.

Curaçao Festival Center

E asuntu  ku Curaçao Festival Center tin 20 aña sin paga belasting, kisas ta referí aki na pago di Erftpacht Cannon di CFC.  Tin un dokumento firma , kaminda for di inisio di CFC, den kua un Diputado ta sugerí pa laga e kompleho kai bou di e institutonan ku ta paga un suma simbóliko, komo ku ta trata aki di  un Sentro ku aparte ku ta organisá festival tumba aden, ta duna oportunidat pa sentenáres di hóbennan ku ta bini di mayornan ku tin entradanan abou, ta risibí instrukshon musikal grátis. Ademas Curaçao Festival Center durante aña ta duna koperashon na vários organisashonnan sosial, ku no tin e fondonan na nan alkanse pa kubri gastunan pa organisá nan aktividat.

Instituto pa Formashon Musikal

IPFM  ta tratando pa solushoná e problema di finansiamentu struktural pa e proyekto di formashon musikal grátis pa hóbennan den bario. Finalmente, AMAK ta pidi pa tur hende keda trankil, ya ku direktiva di AMAK i CFC durante último lunanan ta trahando intensivamente ku invershonistanan ku ke sea partisipá den Festival di Tumba o invertí den optimalisashon di e kompleho. Pa hasi esaki ta nesesario pa tin un ambiente trankil pa por finalisá tur e trámitenan i pa despues di reuní ku miembronan duna prensa e informashonnan konserní.