Willemstad – yüli 2014: Resientemente ENNIA a pone Norderick Marti, alumno di 12 aña di edat di Kolegia Don Sarto, den spòtlait. Norderick a slag pa HAVO i komo rekompensa a haña un lèptòp nobo nobo. Na aña 2011 ENNIA a adoptá Kolegio Don Sarto i tur aña ENNIA ta premia e kantidatonan pa HAVO ku un lèptòp. E alumnonan di e skol adoptá pa ENNIA a logra resultadonan bunita pa loke ta e prueba final (EFO-toets), i no por a laga esaki pasa bai sin mas. ENNIA  a hasi uso di e oportunidat pa pone Norderick Marti di Dokterstuin den spòtlait. Norderick ta e úniko alumno den su aña eskolar ku a slag pa HAVO i a premia e logro akí ku un lèptop nobo nobo. E aña eskolar nobo akí Norderick ta bai Maria Imaculata Lyceum. Miembronan di gerensha Ralph Palm, President of the Managing Board di ENNIA i Reinald Curiel, Direktor Komersial di ENNIA a entregá Norderick e lèptòp. “Nos ta orguyoso di e alumnonan di Kolegio Don Sarto i hopi kontentu ku e logronan. Den enseñansa mas i mas lèptòp ta bira un nesesidat. “Ku e gesto akí nos ta spera di kontribuí di un manera positivo na Norderick su sobrá trayekto den enseñansa”, sigun Palm después di a entregá e leptop. Señor Palm i señor Curiel mes ora a yama bon biní tambe na e kabes di skol nobo señora Lisette Marlin. E ta remplasá señor Juan Schotborg ku ta tuma despedida dje skol después di 38 aña pa bai gosa di su penshun bon meresí. Riba potrèt: di robes pa drechi: Juan Schotborg, Lisette Marlin, Ralph Palm, Norderick Marti i su mama Mildred Marti i Reinald Curiel durante entrega di e lèptòp.