WILLEMSTAD – Nunka ba yega di enamora asina profundo of eksperensia un pashon intenso ku bo no kier a laga e otro persona bai? Esei ta e emoshon ku Remses Rafaela miho konosi komo e bailarin i rapper MuisjeMuis, ke komunika ku ‘Allang Allang’. Ela kolabora ku e talentoso rapper kurasoleño DANDO ku tambe ta hasi un tremendo trabou riba e kantika.

E kimika musikal entre Dando i MuisjeMuis ta asina great ku nan a disidí di traha huntu i produsi un EP ku ta plania pa salí na mart 2020. Según MuisjeMuis ya e ku DANDO a kompletá e promé track riba e EP aki i lo sigui publiká mas komposishon hot.

DANDO, kende a nase komo Jearnell Luidens, tin hopi aña biba na Hulanda i ta kreando su nòmber komo rapper den e esena urbano. Resientemente DANDO a firma ku label Big Fish Empire i a kaba di lansa su debut álbum. Pa esaki DANDO bin Kòrsou resientemente pa promové su músika nobo. Ya kaba DANDO ta trahando riba músika nobo, dus 2020 ta mustra alentador pa e veterano di rap antiano. ‘Allang Allang ’ E di dos single di MuisjeMuis pa 2019 tambe ta den e ritmo Afro Beat, i a keda produsi pa e talentoso produktor Zurich Music. Aki atrobe a meskla músika Karibense, huntu ku e trap merikano ku tog tin un toke latino. Ku e kantika ‘Allang Allang’ ku DANDO, Muisjemuis ta keda trese su estilo musikal úniko pa demostra un bes más kon versátil su e talento ta realmente.

Pa e próksimo sinku aña bo por mira Muisjemuis den un eksposishon representando Kòrsou na ‘Wereldmuseum’, sitúa na Rotterdam. Aktualmente Muisjemuis ta e bailarin prinsipal di e tour pa teatro di Bboy na Maastheater, unda henter Rotterdam ta di plak ku posternan ku ta propaganda esaki. Muisjemuis ta priminti di keda trese mas músika nobo pa fin di aña, i pa 2020 e ke lansa mas produkshon propio. Tambe lo e koreografía un aktuashon infantil kompletu. Pues no drumi riba Muisjemuis paso e pashon pa músika ta kima den su venanan.

E videoclip di ’’Allang Allang’ ’ ta disponibel riba YouTube na https://youtu.be/sMHuBa3PDvc e single por keda pidi na tur radio popular riba nos isla. Bo por siguí Muisjemuis riba www.facebook.com/Remses Rafaela/Muisjemuis i Instagram @muisjemuis i informa pa presentashon na muisonly@gmail.com