Hunto cu COA lo Promove e Balor di Deporte pa Henter Comunidad

Oranjestad, juni, 2016–Durante di un rueda di prensa diahuebs mainta, Sra. Sharon Fränkel-de Cuba, Managing Director di Aruba Bank, y Sra. Nicole Hoevertsz, Secretaria General di Comite Olimpico Arubano a firma e acuerdo oficial di nan aliansa strategico pa e siguiente cuatro (4) aña, esta for di 2016 te cu 2020.

E convenio entre Aruba Bank y COA ta basa ariba e sosten di e vision y mision di e organisacion olimpico y e principionan fundamental cu nan ta para pe. Den e cuadro aki Aruba Bank a haña cu nan ta identifica nan mes cu e movemento olimpico mundial y a scohe pa sostene e idealnan, balornan, y filosofia inculca den dicho organisacion, tanto localmente como internacionalmente.

Durante di e conferencia por a nota cu mientras e importancia di e laso aki tambe ta pa sostene e participacion di e hende muhe ariba tur nivel di deporte y e esencia di conscientisa e pueblo en general di e importancia di deporte pa e desaroyo humano den comunidad pa tur esnan representando COA y Aruba Bank tawata hende muhenan den posicion di liderazgo.

COA y Aruba Bank oficialmente tambe lo aporta directamente na e binticuatro (24) federacionnan cu ta cay bou COA y tur atleta cu di un forma of otro ta beneficia di esaki, mescos cu e ekipo Olimpico Arubano.

Ambos partido ta sumamente positivo cu e union unico aki, cu ta uno historico pa partnernan y pa Aruba, ya cu ta e prome ekipo olimpico caminda cu ta participa cu atletanan cu a clasifica pa participa na e Weganan Olimpico. Te cu awor ya caba shete atleta a logra nan clasificacion pa e Weganan Olimpico di Rio 2016.