WILLEMSTAD — Awe djarason dia 3 di òktober 2018, Alexandra Atalita, Miss Earth Curaçao 2018, ta Sali ku buelo di KLM for di Amsterdam pa Manila, Filipinas, kaminda e lo bai representá Kòrsou den e sertámen di Miss Earth 2018.

Manera ta konosí, luna pasa, Alexandra Atalita a keda koroná komo e representante máksimo di Kòrsou pa loke ta trata e sertámen di Miss Earth ku e aña aki lo tuma lugá na Filipinas.

Alexandra Atalita ta bibando na e momentunan aki na Ulanda i a prepará tantu aki na Kòrsou komo na Ulanda pa e sertámen aki i ta bai ku un konfiansa grandi pa representá su pais natal na un manera digno.

BIOGRAFIA ALEXANDRA

Alexandra Atalita for di su 11 aña di edat ta den e mundu di beyesa i a yega di modelá no solamente na Kòrsou, pero tambe na Aruba, New York i Ulanda.

E aña aki Alexandra Atalita a partisipá na Miss Earth Netherlands, kaminda el a sali promé finalista di su provinsia na Noord Brabant. Komo kiera ku Alexandra sali promé finalista, e organisashon di Kòrsou a aserk’é pa e bira representante di Kòrsou. Koronashon di esaki a tuma lugá dia 26 di ougùstùs último.

Aki na Kòrsou, Alexandra Atalita, konsiente di e situashon di medio ambiente i konservashon di nos sistema ekológiko, e la partisipá na vários beach clean up huntu ku Sea Turtle Convervation Curaçao.

Su meta ta pa hasi hende konsiente tokante di Medio Ambiente di Kòrsou, kaminda nos mester kuminsá usa ménos plèstik. Konservashon di nos medio ambiente aki na Kòrsou ta si sumo importansia.

Esnan ku ta interesá por follow Alexandra Atalita via su instagram ku ta @alexandra.atavu. Tambe por like su Facebook Page ku ta: Miss Earth Curaçao 2018 – Alexandra Atalita.

Alexandra Atalita lo bai keda Filipinas durante 1 luna largu, kaminda nan tin un programa bastante kargá. E sertámen mes lo tuma lugá djasabra dia 3 di novèmber 2018. Esnan ku ta interesá tambe por follow Miss Earth 2018 via di http://missearth.tv/