Albert Schoobaar ku orguyo ta anunsiá lantamentu di su propio grupo di teater Bulabanda. Teatro Bulabanda lo lanta bida artístiko di teater aki na Kòrsou for di soño:
– Bulabanda lo desaroyá obra (semi)profeshonal pa un públiko general, kuminsando aki na Kòrsou ku ambishon internashonal;
–  den tayer ku dosente lokal i internashonal, Bulabanda lo duna su aporte na krea e profeshonalnan di teater di mañan. Lo tin lès di aktuashon, skibimentu di teksto pa teater i hopi mas;
– banda di obranan di teater Teatro Bulabanda lo uza otro tipo di aktividat tambe pa stimulá diskushon den sosiedat. Ken nos ta, unda nos ta bai antó kon nos por kuminsá traha huntu pa subi bienestar di nos lugá?

Despues di mas di kasi 20 aña di eksperensha skirbiendo, aktuando i dirigiendo obra di teater, aktuando tantu den teater i televishon na Kòrsou, Antia, Sürnam, Bèlgika i Hulanda, Albert Schoobaar ta kla pa e próksimo kapítulo den su bida artístiko. A yega ora pa madurá. Pa papia bèrdat i enfrentá nos mes i nos miedunan. Albert Schoobaar ta sigur ku e teater di kalidat ku e ke trese, lo yuda e proseso akí. Ban hari, yora, diskutí i krese huntu.

Dikon e nòmber Bulabanda?
Bulabanda ta nòmber di un ritual Kongoles, den kua ántes un hende sklabisá na Afrika, por a skohe di kambia di doño bulando banda. Aki na Kòrsou e tradishon a bira un manera mas definitivo di kaba ku sklabitut bulando bai Afrika bèk, si bo no a kome salu.  Bulabanda pa Albert Schoobaar ta nifiká e ora ei outo-liberashon: no pone responsabilidat di bo bida den man di otro hende.

Teatro Bulabanda ta un inisiativa ku sosten di diferente persona:
Lider Artístiko i fundadó: Albert Schoobaar
Lider General I komersial: Marlon Reina

Direktiva:
Presidente: Noëlla Bérénos-Ruivenkamp
Sekretario: Garrel Rosario
Miembronan di direktiva: Greta Trapenberg i Reinald Curiel

Bulabanda kier gradisí sr. Norman de Palm i Notariskantoor Chatlein pa nan sosten.