Awor por ‘swipe’ ku karchi di ACU na mashinnan di Girobank i lanta sèn na ATM-nan di Girobank

WILLEMSTAD – Resien Girobank a yega na un akuerdo di kolaborashon ku ACU, e koperativa pa spar i krédito mas grandi di Kòrsou, pa brinda mas servisio na klientenan di ámbos instansia. E benefisio prinsipal ta ku awor por usa karchi di ACU na tur mashin di ‘swipe’ di Girobank i ATM-nan di Girobank. Esaki ta kumbiniente pa e kliente di ACU ku di awor en adelante por usa su karchi di ACU na hopi mas tantu sitio  ku tabata e kaso ántes. Tambe pa e diferente empresarionan ku ta hasi uso di e mashinnan di ‘swipe’ di Girobank, esaki ta motibu di alegria. E fasilidat èkstra di pago ku nan por ofresé awor na nan klientenan , ta un benefisio atraktivo pa e míles di miembronan di ACU bin hasi kompra serka nan.

Sigur i fleksibel

Girobank ta pone hopi atenshon na siguridat di su mashinnan di ‘swipe’ i su ATM-nan.  Pa e motibu aki, miembronan di ACU por hasi uso di e servisionan di un forma trankil i safe. Di otro banda, introdukshon di e fasilidat di pago aki ta hopi fleksibel; ni e kliente di ACU, ni e empresario no tin ku hasi niun akshon èkstra i por probechá mes ora di e servisio nobo.

Bon servisio na kliente ta prioridat

E akuerdo entre Girobank i ACU a nase for di un kompromiso mutuo pa konsentrá mas riba duna mas servisio na e kliente. Pa fasilitá e kliente, tin un lista di tur tienda i otro tipo di negoshi  ku ta hasi uso di un mashin di ‘swipe’ di Girobank riba www.girobank.cw i tambe riba www.acu.cw.  Banda di esaki, tur e negoshinan tin un anunsio visual pa laga e kliente sa ku por usa e karchi di ACU (Acuito) serka nan.

Mas informashon?

Komuniká via telefón ku ACU su Sentro pa Kliente na 434-7100 òf manda un e-mail na info@acu.cw