WILLEMSTAD – 15 di mart 2021 – Ofisina di Turismo di Kòrsou (CTB) i Stichting Dierenbescherming Curaçao a firma un akuerdo di koperashon pa atendé e problemátika di kachó ku ta kana lòs riba kaya. Kòrsou tin hopi aña ta konfrontá e situashon aki tantu den nos barionan pero tambe den nos Sentro di Siudat i den áreanan turístiko. Un investigashon hasí na aña 2016 a konkluí ku Kòrsou tin un total di 6000 kachó ku ta kana lòs riba kaya. Konsiderando bienestar di nos animalnan i e bista negativo ku kachónan ku ta kana lòs riba kaya ta duna sigur for di e punto di bista turístiko tabata importante pa kuminsá tuma akshon. Ministerio di Desaroyo Ekonómiko a pone e fondonan disponibel pa ehekushon di e akuerdo di koperashon entre CTB i Stichting Dierenbescherming Curaçao. E akuerdo a keda firmá pa CEO di CTB, sr. Paul Pennicook i sr. Gregory Berry, presidente di Stichting Dierenbescherming Curaçao den presensia di Minister enkargá ku Desaroyo Ekonómiko Dr. Steven Martina, sra. Zita Jesus-Leito, MBA Minister di Salubridat Públiko, Medio Ambiente i Naturalesa, sra. Syreeta Wansing, sekretaria di Stichting Dierenbescherming Curaçao i Direktor athunto di CTB, sr. Hugo Clarinda.

E akuerdo ku a keda firmá pa un periodo di 1 aña ta enserá sosten finansiero na Stichting Dierenbescherming Curaçao pa primeramente traha un asilo pa akapará e kachónan ku keda kitá for di riba kaya. E tereno pa por traha e asilo riba dje ta keda poné na disposishon di Stichting Dierenbescherming Curaçao konforme un akuerdo di maneho ku a keda firmá ku Domeinbeheer. Tambe, Stichting Dierenbescherming Curaçao ta responsabel pa  kuido di e kachónan ku keda kitá for di riba kaya i tambe sterilisashon di e kachónan aki. Un di e otro responsabilidatnan di Stichting Dierenbescherming Curaçao ta tambe pa ehekutá un kampaña di adopshon pa asina yega na doñonan nobo pa e kachónan. Ademas, CTB lo sostené Stichting Dierenbescherming Curaçao den ehekushon di kampañanan di konsientisashon ku énfasis riba sterilisashon di kachó.

E ministerionan embolbí huntu ku CTB i Stichting Dierenbescherming Curaçao ta konta ku komunidat su koperashon pa huntu nos por resolvé e problemátika di kachónan ku ta kana lòs riba kaya.