Museo Kas di Pal’i Maishi ta un museo den aire liber i un museo interaktivo. E kas mes ta data di rònt di abolishon di sklabitut (1863) i a pasa den un proseso di renobashon kontinuo.  E tema di e museo ta: E bida Diario rondó di un Kas di Pal’i Maishi.  E bishitante ta haña un bista di kosnan ku ta sosodé den i rondó di un tipo di kas asina. Banda di guia den e kura di e museo, Museo Kas di Pal’i Maishi tambe ta organisá kaminata den naturalesa i aktividatnan tur djadumingu. E programa di e luna aki ta:

Chukulati ku….                     Fundraising                                         6 di september

Debate: reparashon;      dr. Armand Zunder                                 14 di september

Kuenta i poesia di grandinan di Kòrsou; sr. Roy Colastica           21 di september

Festival di Kuenta na Hòfi Popo Rooyer                                        28 di september

pa skolnan di Bándabou

Chukulati ku….. ta un aktividat di fundraising pa por sigui hasi e trabounan ku Fundashon Museo Tula a komprometé su mes pa hasi. E aktividat ta tuma lugá entre 10.00 di mainta pa 13.00. E karchinan ta kosta fl 20,- i e persona ta haña banda di diferente kos di kome tambe un guia den e museo.

Debate tokante reparashon: paisnan miembro di Caricom, un organisashon di Nashonnan Uni di paisnan di Karibe pa krea un merkado komun, a lanta un komishon ku mester traha na e asuntu di reparashon. Reparashon ta e proseso di eksihí daño prehuisio na esnan ku a hasi  daño na e pais i a perhudiká su hendenan, p.e. pa motibu di sklabitut. Parti di e proseso di reparashon ta kon ta kalkulá kuantu e daño ta teniendo tambe na kuenta e periodo ku e daño a tuma lugá. Un di e personanan ku a investigá e fenómeno aki ta dr. Armand Zunder. Dr. Zunder a kalkulá e daño perhuisio pa Sürnam i a skibi un buki tokante esaki ku yama Herstelbetalingen. Dia 14 di sèptèmber dr.  Zunder lo duna su charla na Museo Kas di Pal’i Maishi.. Dr. Zunder ta presidente di e komishon di gobièrnu  di Sürnam en kuantu e asuntu di reparashon i ta representá komo tal tambe Sürnam den Caricom. E charla ta kuminsá  15.00 di atardi na Dokterstuin. Un di nos grandinan di Kòrsou riba tereno di literatura ta Roy Colastica, eskritor, poeta  i deklamadó. Sr.  Colastica lo lesa di e grandinan di nos literatura manera Elis Juliana,  Pierre Lauffer. Bin pasa un ratu plasentero . Despues ku bo a bebe di e kreatividat di nos grandinan via e presentashon di Roy Colastica bo tin sufisiente energia pa simannan largu. E presentashon ta  21 di sèptèmber di 15.00 pa 18.00. Dia 28 di sèptèmber  Museo Kas di Pal’i Maishi ta sera e luna ku un festival di kuenta na hòfi Popo Rooyer. E tema ta: Kompa Nanzi i Shi Maria ta forma parti di un famia graaandi. Ku e tema aki, Museo Kas di Pal’i Maishi ta pone e arte di konta kuenta riba pedestal  i na mes momentu ta pone lus riba famia. Ku e aktividat aki Museo Kas di Pali Maishi ke duna un aporte na uni skolnan di bándabou den aktividatnan plasentero di nos kultura.  Durante e festival aki alumnonan di tur e skolnan di Bándabou ta kompetí ku nan kuentanan. Bin animá e hóbennan i kontribuí asina na nos kultura.