WILLEMSTAD- YANUARI 2015- Resientemente Curaçao Marriott Beach Resort & Emerald Casino a tene nan evento dediká na komunidat di Kòrsou. Kada kuartal e resort ta tene un evento ku ta sirbi pa inspirá su empleadonan pa duna servisio na komunidat, pafó di e struktura di trabou. E ‘Spirit to Serve’ di e último kuartal di 2014 tabata dediká na e muchanan di Seru Fortuna. E aktividat a wòrdu tene na sentro di bario Seru Fortuna i a konta ku asistensia di 163 mucha, ku a selebrá nan fin di aña den gran forma. Durante di e selebrashon e muchanan a risibí un regalo, algu di kome i bebe i por a disfrutá di un presentashon tur afó- ku durashon di 1 ora i mei di e popular agrupashon musikal, Cache Royal. E ídolonan di hubentut a laga e muchanan gosa di un bunita presentashon. Ta gradisí, Curaçao Marriott Beach Resort & Emerald Casino su banda di ‘kas’ Jilly’s Band pa nan koperashon den ofresé e instalashonnan musikal i tur instrumènt komo regalo na e ‘Spirit to Serve’ pa Cache Royal por a presentá durante di e aktividat.

Tokante di ‘Spirit to Serve’:

“Spirit to Serve the Community” tei pa duna bèk na e komunidat na unda ku Marriott tin su instalashonnan; e ta un parti importante di e kultura empresarial. Dor di traha huntu ku fundashonnan i organisashonnan karitativo Curaçao Marriott Beach Resort & Emerald Casino ta sirbi e komunidat di Kòrsou den diferente forma. Entre otro, alohamentu i alimento, medioambiente, preparashon i entrenamentu pa un kupo di trabou na e hotèl, vitalidat di e muchanan i e promoshon di diversidat.