AHUSTE NA PERIODO DI FAKTURASHON DI UTS

Willemstad,13 di ougùstùs 2019 – Pa medio di esaki, UTS ta informá su apresiabel klientenan ku e periodo di fakturashon pa servisionan suskribí, lo kambia entrante 20 di ougùstùs 2019. Entrante e fecha aki, fakturashon lo kore for di 20 di kada luna te ku dia 19 di e siguiente luna en bes di dia 26 pa 25 di kada luna. E ahuste na e periodo di fakturashon aki lo ser efektuá pa klientenan na Kòrsou, Boneiru, St. Maarten/Saint Martin, Saba, St. Eustatius i kendenan tin servisionan manera mobil postpago, internèt i telefòn di kas/negoshi, ‘vehicle tracking’ i otro servisionan ku ta ser kobrá pa luna. 

KIKO ESAKI TA NIFIKÁ PA KLIENTENAN DI UTS?

E periodo di fakturashon pa luna di ougùstùs 2019 lo ta 5 dia mas kòrtiku ku e periodo usual di tur luna. E faktura pa ougùstùs 2019 lo kore di 26 di yüli 2019 te ku 19 di ougùstùs 2019 i e gastunan fiho mensual lo ser rekalkulá a base di e periodo di fakturashon aki ku ta mas kòrtiku. Tur otro gastunan insidental òf adishonal ku ser hasí den e periodo aki, lo ser fakturá manera kustumber. E faktura pa sèptèmber 2019 lo reflehá atrobe un periodo di fakturashon ku durashon di un luna ku ta di 20 di ougùstùs pa 19 di sèptèmber 2019.  Ta importante pa tuma nota ku e fecha di vensementu di fakturanan i fecha pa ‘direct debit’ lo no kambia. Esakinan lo keda meskos, esta e promé (dia 1) di kada luna, p’asina no krea ningun bruashon den e planifikashon i skema finansiero di nos klientenan. UTS ta gradisí tur kliente p’e komprenshon, miéntras nos ta hasi e ahuste atministrativo den nos periodo di fakturashon.