Turismo di calidad ta rekeri un servicio di calidad superior
ORANJESTAD, Aruba – October 2018: Diasabra dia 24 di november, Aruba Hotel and Tourism Association (AHATA) ta anuncia nan “Excellence Awards” anual durante un cena na The Ritz-Carlton Aruba. E premionan lo honra e personanan cu ta sobresali den servicio den e sector turistico. E sector ta sostene 88% di e economia (GDP) di Aruba y miembronan di AHATA ta representa como 10,000 empleado cu ta brinda servicio di calidad pa contribui na e exito di nos pais. Tin un total di 6 categoria, esta “Employee of the Year”, “Supervisor of the Year”, “Manager of the Year”, “Young Tourism Professional of the Year”, “Lifetime Achievement Award” y un categoria nobo “Sustainability Champion of the Year”. Tres miembro di hurado independiente y cu conocemento di turismo, tin e tarea dificil di scoge entre 48 nominado excelente pa 5 categoria. E Hunta di Directiva di AHATA lo nombra un persona cu a destaca den su carera pa mas cu 25 aña pa ricibi e “Lifetime Achievement Award”.
Aruba a conoce un bon aña den turismo, pero ta para dilanti un aña yen di reto. Ta e forma con ta atende cu nan y ta prepara pa nan for di adelanta, lo determina cu na final nos ta comberti e retonan aki den oportunidad pa crecemento y exito pa e pilar di nos pais. E elemento di suma importancia pa e bienestar di nos economia ta e nivel di servicio personal cu nos por brinda. Pesey e premio di AHATA’s Excellence Awards ta di tan importancia, pa celebra nos miho embahadornan den turismo y pa inspira hende hoben di Aruba pa busca un carera den e sector.
Aña pasa, e ganadonan di e AHATA Excellence Awards tabata Harold Rasmijn, Restaurant Captain na Chophouse di Manchebo Beach Resort & Spa como “Employee of the Year”; Adriaan Albertsz, Engineering Supervisor na Hyatt Regency Aruba Resort, Spa & Casino como “Supervisor of the Year”; Aldrick Farro, Facilities Manager di Aruba Marriott Resort & Stellaris Casino como “Manager of the Year”; Javier Sint Jago, Energy Manager di Divi Tamarijn Aruba Beach Resort como “Young Tourism Professional of the Year”, mientras cu Hubert Kip, Pit Boss di Aruba Marriott Resort & Stellaris Casino a ricibi e homenahe di “Lifetime Achievement Award”.
Por nomina ganadonan di AHATA’s Excellence Awards den categoria di empleado y supervisor, pa e competencia di Caribbean Hotel & Tourism Association Awards, cu ta reconoce excelencia den e region di Caribe. Aña pasa candidato di Aruba, Harold Rasmijn, a sali ganado di “Employee of the Year” di henter Caribe durante un evento di CHTA teni na Miami.
Durante a anochi di homenahe dia 24 di November, AHATA lo haci donacion na Universidad di Aruba, Facultad di Hospitality & Tourism y na Colegio E.P.I sector HORECA, pa yuda cu educacion di nos futuro empleadonan den turismo