ORANJESTAD, 30 di Mei 2017 – ARUBA: Aruba Hotel & Tourism Association (AHATA) recientemente tabata anfitrion di un presentacion pa su miembronan encuanto di certificacion internacional pa cu nan maneho sostenibel pa medio di Travelife, un organisacion basa na Inglatera. Travelife ta dedica na haci vakantie mas sostenibel, y ta traha cu companianan envolvi den e mundo di biahe mundialmente pa yuda nan mehora nan impacto social, economico y medioambiental. Tin diferente hotel na Aruba cu tin un certificacion di Travelife, y tin hopi interes di parti di otro negoshinan miembro di AHATA cu ainda no ta envolvi den e programa pa logra nan certificacion. Companianan cu ta logra cumpli cu criterionan di sostenibilidad di Travelife ta haya nan certificacion, y esaki ta yuda nan pa promove nan logronan, y atrae negoshi. E presentacion, por cierto hopi bon atendi, cu AHATA a organisa tabatin dos topico principal, esta con hotelnan cu ainda no ta forma parti di e programa por implementa Travelife, y kico hotelnan cu ya ta certifica por haci pa prepara pa nan re-certificacion.

A conta entre otro cu presencia di representantenan di Divi Resorts, un cadena cu na Aruba tin cinco hotel cu un total di cerca di 1000 camber. Henk Swart, kende ta Chief Engineer di Divi/Tamarijn tabata particularmente interesa den con pa prepara pa un audit (evaluacion) di Travelife. Swart a splica cu e diferente reglanan cu nan ta aplicando na e hotelnan di Divi ta yuda nan spaar hopi energia. E beneficio adicional ta cu hopi di e empleadonan ta contento cu e conocemento y custumbernan nobo cu nan ta adkiri riba e tereno aki como cu nan ta aplica e reglanan aki na cas tambe, y personalmente tambe ta spaar hopi energia, el a agrega. Divi/Tamarijn ta haci nan miho esfuerso pa produci menos desperdicio, uza mas producto local, y tur dia ta mas consciente di e coriente, awa y gas cu ta wordo uza. E impacto di un compania di casi 1000 camber ta basta grandi, y tur hende mester ta mas consciente cu nan uzo di awa, coriente y gas, Swart a laga sa.

AHATA semper ta yuda cu informacion, y pa siman ta yega na tur su miembronan por lo menos un publicacion cu informacion valioso; e topiconan ta inclui informacion riba medioambiente, pero tambe riba topiconan manera tsunami y con pa prepara, Swart a bisa. Buddha Jezu-Maria ta e ehecutivo di mercadeo y comunicacion pa Travelife kende ta traha cu operadornan di tour pa cu nan strategia di sostenibilidad. E presentacion, Jezu-Maria a comenta, principalmente tabata basa riba con pa trece beneficionan social y economico pa e hotelnan y e areanan cu ta rondona nan. El a observa cu na Aruba hotelnan ta haciendo caba hopi cos riba tereno di iniciativanan di medioambiente cu ta pas bon cu e metanan di Travelife. E gerente encarga cu miembresia na Travelife, esta Larisa Birthwright tambe a tuma parti na e presentacion, y a splica cu e tin shete aña cu Travelife y den e tempo cu a transcuri semper tabatin hotelnan certifica na Aruba, y cu tin un consistencia den esaki. Birthwright a remarca cu hopi hotel ta haciendo algo innovativo den e area aki, y nan ta haciendo bon, logrando nan metanan. E envolvimento ta grandi. Birthwright a comenta cu e hotelnan aki sa kico nan ta haciendo y sa nan limitacionnan como tambe nan sa kico nan por haci pa mehora nan situacion. El a agrega cu algun otro destinacion y hotel, of grupo di hotel, no tin e forsa hunto cu hotelnan na Aruba tin den e colaboracion cu ta existi den AHATA.

E presentacion di Travelife a conta cu un bon recepcion, y Charmain Sealey, kende ta un auditor independiente lider pa e organisacion, a laga sa cu e tabata contento cu e publico por a haci hopi pregunta. E hotelnan ta interesa den mehora nan practicanan sostenibel, y aunke Aruba no tin algun leynan pa cu sostenibilidad, cu si tin den algun otro destinacion, e hotelnan ta haci loke nan por como nan contribucion na responsabilidad social.